KUCHING: Taja adan menua udah dibuka kena 1 April tu tadi tang Indonesia apin ngemendarka rayat sida tama ke Malaysia.
Menteri Nembiak, Lumba enggau Pemansang Pedagang Sarawak, Datuk Seri Abdul Karim Rahman Hamzah madah, taja iya nya semina nyadi ngagai rayat Indonesia lalu ukai menua bukai.
“Taja pia, tu enda ngaul rayat Malaysia ke diau din laban semina peranak Indonesia aja enda dikemendar tama ke Malaysia.
“Brunei mega baka nya nyentuk 15 April tu. Naka tu, aku pechayaka sida benung beratika proses tu bekaul Atur Pengawa Standard (SOP) ke mesti ditetapka ungkup rayat ngambi ulih masuk enggau pansut ari menua sida,” ku Karim.
Karim mansutka jaku nya lebuh dirandau pemberita pengudah ngulu Pengawa Nyain Sempekat Pemereti Ati (MoU) entara Dayakdaily enggau Friends of Sarawak Museum (FoSM) di Palan Aum Borneo Kuching (BCCK), kemari.
Karim madah, ba renggat nengeri, Komiti Penyangga Penusah Nengeri Sarawak (JPBNS) enggau opis imigresyen udah berandauka pekara nya.
Ngelansa silik pasal menua ngalih ngagai endemik, iya madah bemacham aktiviti udah diperambu diatur ila.
“Aktiviti baka Pengerami Muzik Dunya Rainforest (RWMF), Pengerami Jazz Borneo (BJF), marathon enggau ke bukai deka diatur.
“Ulih diperati semua aktiviti dagang temuai ke deka diatur nunjukka kitai belubah pulai ngagai pengidup asal baka sebedau pandemik Covid-19,” ku iya.
Taja pia ku Karim, mensia mayuh tetap mesti bejejaga laban igi penyakit tu enda punas.
Iya mega andalka raban ari industri dagang temuai baka hotel enggau palan pematak temuai tentu gaga nganti aktiviti nya ranchak diatur.
Nambahka nya, Adun Asajaya nya sempat ngemata MoU entara Dayakdaily enggau FoSM kelai kerejasama entara kededua raban nyeridi pemacha lebuh nyendiaka penerang ke betul pasal sejarah Sarawak.
Tu mega sebagi ari chara narak pemacha Dayakdaily ngembuan penyedar pasal pemesai guna belajarka sejarah enggau pesaka menua ngelaika kitai rayat Sarawak.
Nengah MoU nyam Dayakdaily deka ngaga artikel dua minggu sekali pengelama tiga taun bepun 1 April 2022 nyentuk 31 March 2025 ba sukut dikumbai “Warisan Coretan dari Sarawak”.
