Indu balat bakal tepelanting ari kerita

BINTULU: Siku indu berumur 21 taun ke deriba kerita Toyota Hilux balat bakal pengudah belantak enggau sebuah kerita Toyota Camry malam tadi.

Penusah diripotka nyadi enda jauh ari palan besai bebelika barang ba simpang Bintulu-Miri ditu.

Nitih ke penerang ari Opis Bomba enggau Penyah Penusah (BBP) Bintulu, sida nerima kangau ngenyit urung pukul 11.33 malam.

Berindik ari nya, Raban ALPHA BBP Bintulu begulai enggau raban ari Sepital Besai Bintulu sereta raban Opis Polis Bintulu berumban ngesah ngagai endur penusah nyadi.

Lebuh datai dia, sida meda sebuah kerita Toyota Hilux enggau sebuah kerita Toyota Camry sigi udah belantak baka diripot.

Taja pia, lelaki beumur 44 taun ke deriba kerita Toyota Camry nadai apa nama.

Deriba kerita Toyota Hilux benama Alice Su Xue Fen balat bakal pengudah iya tepelanting ari kerita.

Raban bomba nanggung Alice ngena spinal board ngagai endur ti lantang agi ngambika meri awak iya diperubat bala ari Emergency Medical Rescue Services (EMRS) sebedau ditaban berubat ke Sepital Bintulu ngena ambulan.

Operasyen tembu urung pukul 11.54 malam lalu sida mulaika diri ngagai opis.

Suara Sarawak