Indu dara ari Kpg Tuba, Ulu Sebuyau enda nyadang asil pansik bulih anugerah ari WHO

Niat ati semina deka ngiga peneleba nya alai ngambi bagi ba aum besai pasal isu pengerai dunya tang enda disadang mujur teulihka pemujur ngagai siku anak Sarawak ti ngarika Malaysia pengudah menang anugerah Deligasyen Wilayah Asia Tenggara enggau Pasifik Barat Pemadu Manah dalam Aum Besai Simulasyen Organisasyen Pengerai Dunya (WHO) Sheffield 2021 nengah chara online kena 19 March nyentuk 21 March tu tadi.

Indu dara asal ari Kampung Tuba, Ulu Sebuyau iya nya Asrafizra Christine Theama Kunjang, 25, bansa Iban ngembuan pelajar Master Degree Pengerai Mensia Mayuh ari Universiti Sheffield, United Kingdom madah pemujur nya endang enda disadang.

“Aku amat enda nyangka bulih anugerah nya laban semina deka ngiga peneleba mantaika keretas kereja lebih agi bekaul enggau pansik pengerai dunya.

“Tambah mega, orang ke enggau besemakih chukup mayuh iya nya bisi 62 buah menua enggau 71 buah Gerempung Ukai Perintah (NGO) ke dipasuk raban profesional ngujungka aku enda berapa andal ulih menang sebarang anugerah,” ku iya maya dirandau Suara Sarawak, apin lama ke udah.

Ku iya, aum besai nya diatur ninting taun lalu ngempuruka bala pemekit ari seraya dunya dipasuk raban profesional enggau ukai profesional berandauka isu pengerai dunya enggau tanggung pengawa Gerempung Pengerai Dunya (WHA) dalam mutarka isu bekaul enggau pengerai.

Asrafizra Christine Theama Kunjang

“Taun sebedau tu, aum tu diatur ba Indu Opis Gerempung Pengerai Dunya (WHO) di Geneva tang taun tu digaga nengah chara online ketegal pangka pandemik Covid-19,” ku iya.

Ku iya, dikena masuk aum nya ukai muntang laban genap orang tu deka ngambi bagi deka dipantis lalu perambu keretas kereja sida mega deka dibantai. Semina perambu ke pemadu manah deka dipilih ngarika menua diri.

Ku iya, rambai jaku ungkup aum besai edisyen keempat tu iya nya bekaul enggau isu ngemansang enggau negapka sistem pengerai nuju pekara ke lebih manah.

Topik ke dipilih Christine iya nya polisi mikro ngurangka penyibil pengering pengerai mai tuah laban buah penemu manah pasal pengawa Perintah Malaysia ti deka ngedut takah penyibil servis pengerai ba sitak menua pesisir enggau menua ulu enggau sitak mengeri.

“Ambika chunto, perintah kitai nyendiaka servis doktor terebai ungkup rayat di menua pesisir awakka sida bela ngasaika servis beperesa pengerai.

“Udah nya, pemedis deka nurun ke klinik, sepital sereta ngulihka bekal ubat mega meri pangka ngagai penyibil tu dikena ngulihka servis pengerai seikas enggau orang ke diau di mengeri,” ku iya.

Ku iya, maya pandemik Covid-19 mangka dunya penyibil nya majak berupai laban staf opis pengerai napi tanggung pengawa ke chukup berat ngelaban penyakit tu kelimpah meri servis ngagai pesakit bukai.

Kelimpah ari nya, iya madah sistem pengerai Malaysia dalam ngelaban pandemik Covid-19 suah dipuji menua luar ba aum besai nya laban pemujur perintah napi pengerekai pandemik nya enggau penyampau kes suman chukup mayuh.

Berita penuh ba surat kabar Suara Sarawak pagila.

Rintai pemenang anugerah deligit

 

Suara Sarawak