Indu Iban landik megai ubung

SIBU: Pua kumbu iya nya sebansa pua tenun asal raban bansa Dayak Iban.

Nampung kenang sida ke tuai menya, indu Iban balat ngemeranka pengawa betenun.

Sida chukup landik sereta nemu nenun Pua Kumbu, Kain Pandak, Baju Burung enggau sirat nyadika gari enggau tuju pengawa ke bukai.

Kebuah sida indu Iban balat ngemeranka pengawa betenun laban niat ati sida ngambika bulih puji ba pengawa megai ubung.

Pia mega indu Iban ti landik ngereja pengawa megai ubung tau digelar kitai Indu Takar, Indu Gar, Indu Sikat, Indu Kebat, Indu Tau Muntang, Tau Nengkebang.

Gelar ti baka nya tinggi amat pangkat ba pendiau bansa Iban ke tau ngangkat status rama sida ke indu dulu suba.

ADAT LAMA… Pengawa miring mega begunaka Pua Kumbu endur mantaika rengka pirang.

NGAGA UBUNG

Dulu kelia ubung bedau bisi di menua kitai enda baka kemaya hari tu, nya alai indu Iban ngaga ubung kediri empu.

Sida betanamka taya tauka kapuk ba empalai lebuh udah tembu ngetau lalu ari taya nya sida ulih ngaga ubung ti digasingka sida ngena pengasing ubung.

Lambar ubung nya tadi lalu dichura sida ngena rakit baka jerenang, engkala burung, tarum, janit, bangaley enggau urat engkudu lalu digulai sida enggau minyak kepayang.

Udah nya lalu diperambunka di tanju beberapa malam ke alai pengawa ti berambunka ubung baka nya dikumbai ngembun.

Kenu ku pengarap lama ke ditampung, indu Iban nemu nyura enggau ngembun ubung ari ajar Indai Manang Jarai.

Ba pengawa ngaga ukir buah pua nya, lambar ubung nya tadi dikebat tauka diikat ngena lemba.

Pengawa ti nanchang lambar ubung ngena lemba nya dikumbai ngikat tauka ngebat ke alai pengawa tu digaga sebedau ubung nya ditenun.

SIKAR… Indu rumah panjai di Nanga Sumpa agi ngemeranka pengawa betenun.

GUNA PUA KUMBU

Enti kelia, indu Iban enggai enda ngembuan Pua Kumbu ngambika bisi dikena sida nyambut antu pala ti ulih laki tauka ambai sida lebuh baru pulai ngayau.

Pua Kumbu ti dikena nyambut antu pala mega enda tau sebarang buah nitihka status enggau gelar bujang berani diulih sida ke lelaki.

Pua Kumbu beguna maya ngaga sapat enti lebuh diri sebilik bisi mati enggau dilempai ba tali temeran ditanchang melintang ba mua pintu ngelai pemali rumah ditiki kandang tiga hari pengudah manang ngantung pelepa lebuh belian.

Pua Kumbu mega dikena ngerayung pandung enggau meligai lebuh begawai umai sereta kena ngebap mua benda kebuk lebuh maya Gawai Namaka Tuah.

Ari tusi sida ke tuai, Pua Kumbu mega digagaka kuta basa lebuh pengerami melah pinang enggau ngerayung langkau babi sandau, ngerayung panggang babi tauka manuk lebuh maya Gawai Antu.

Kelimpah ari nya, Pua Kumbu suah dikena ngias rumah enti bisi pengawa tauka pengerami besai baka melah pinang kelimpah digaga nyadi tepa ngagai bala temuai dibasa ba pengerami nya.

Suah mega kitai mega sida ke indu nyandik anak ngena Pua Kumbu ngambika anak mit nya likun enggau bepengerai.

NAMA BUAH PUA KUMBU

Nama ukir tauka buah pua tu ti ditenun indu Iban endang mayuh macham ke ngambi nama macham-macham utai ba langit.

Taja pia, sebut nama Pua Kumbu ti besai tauka tinggi agi pangkat nya dikumbai sida Lebur Api, Bali Begajai, Kumbu Muau, Bali Berandau, Remang Berarat, Kayu Betimbau, Bandau Nulang enggau Bali Ensuga.

Nama buah Pua Kumbu tinggi agi pangkat ke bukai nyengkaum Bali Bangkung, Bali Berinjan, Bali Belulai, Bali Menyeti, Bali Tengkebang, Bali Kelikut, Bali Sepepat enggau Kumbu Rayung.

Kelimpah ari nya, bisi mega nama Pua Kumbu ti baruh agi pangkat ke dikumbai sida Begajai, Leku Sawa, Manang Iling, Orang Chayam, Gerama Murung, Engkatak, Igi Nibung enggau Tangkung Sepepat sereta Kara Jangkit.

Sebut nama pua nya tadi endang suah disebut orang ke tuai dalam leka main enggau jaku tuai Iban baka ti didinga kitai dalam leka timang, pengap, renung enggau jaku sempama.

Bisi sekeda buah Pua Kumbu diambi ari kenyap tauka diasuh antu ditenun sida ke indu

Sida ke tuai mega suah mesan, sekeda buah Pua Kumbu enda tau diangkat ngapa enti enda ari mimpi tauka kenyap nangika alah ayu enti enda tuai bulu.

Nya alai, sekeda buah Pua Kumbu disabang ngena piring ading enggau sabang bukai ngambika indu ti ngangkatka iya kering semengat.

BULIH GELAR… Pengelandik megai ubung deka ngangkatka status sida ke indu

SEGANG PEMANSANG

Taja diatu gamal ukir buah pua nya jarang ulih dipeda tang manah agi enti kitai nemu sereta ngingatka sebut nama pua nya ngambika bisi ditampung ngagai rebak baru.

Amat pan enda ngelala ukir nya agi tang manah kitai nemu nama sida lalu kitai ulih nanya sida ke tuai enti bisi tetemu laban kemaya hari, buah tikai anyam bebuah mega mayuh ngangkatka buah Pua Kumbu.

Kitai ulih meda sebelah media rama baka page ba Facebook, webpress enggau ke bukai alai sida ke landik beranyam bekunsika buah anyam enggau penama buah ke diangkat.

Amat indu raban bansa Iban kemaya hari jarang agdipeda ngemeranka pengawa ngaga Pua Kumbu ngena chara embun enggau ikat tang sida ngalih ngagai kereban moden baka ngena ubung ti bechura enggau bekebelik dibeli sebelah kedai.

Pengawa ngaga Pua Kumbu, Kain Pandak, Baju enggau Selampai diatu nyau muntang agi laban nyauka semua kereban udah disedia enggau djual seriris enggau singkang pemansang nuju dunya maju.

Pekara pemadu beguna iya nya ngemeran enggau nampung penau enggau pengelandik megai ubung tu ngagai rebak baru.

Nya alai, sida ke tuai anang enggai ngansak enggau meransang bala anak enggau nembiak bukai belajar sereta angkunka pengawa asal kitai bansa tu ngambika iya enda punas ngapa jemah.