Indu mengeri S’wak richah rami ujung April tu

KUCHING: Bemacham akitiviti deka diatur ujung bulan tu dikena ngerichahka Mengeri Besai Kuching seraya ngemai rayat berami.

Menteri Dagang Temuai, Seni, Main Asal, Nembiak Enggau Lumba, Datuk Abdul Karim Rahman Hamzah madah, aktiviti dipungkal enggau Festival Filem enggau Anugerah Filem Entarabansa (AIFFA) berengkah ari 24 nyentuk 27 April.

Seraya Festival Harvest enggau Folklore Sarawak diatur erengkah ari 26 nyentuk 28 April di Kampung Budaya Sarawak.

Ku Karim pengerami tu nyadi program Kimpin Nemuai Ke Sarawak ti udah datai ba taun ke empat diatur.

“Sarawak udah nerima penatai temuai 60 peratus lalu nambah 10 peratus ba bulan Mac pengudah lebih 300,000 iku temuai ari Januari nyentuk Februari,” ku iya.

PEMATAK TEMUAI… Datuk Karim bejadika atur pengerami ba sebuah hotel tebilang di Kuching, kemari.

Festival Harvest enggau Folklore Sarawak tu diatur dikena ngerami pengelain main asal komuniti Sarawak.

“Taja pengerami digulu pupu bansa enggau mandangka pengelain main asal tang kaul serakup entara sida meruan ditan sereta berami begulai,” ku iya rambau aum pengarang berita ba sebengkah hotel tebilang di Kuching ditu, kemari.

Iya mega muji Opis Pemansang Ekonomi Sarawak (SEDC) enggau Kampung Budaya Sarawak ti mujur ngatur pengerami ngaul serakup pupu bansa.

Ku Karim, nengah pengerami tu kitai ulih mandangka penyelai main asal ke bisi di Sarawak seraya ngayanka peneguh kaul rayat ditu ti idup begempung.

“Aku mega ngarapka rebak dudi ulih nampung enggau ngemeranka ulah baka tu, bebasa enggau idup bebaik enggau pangan diri.

Entara atur pengerami udah dirintai iya nya Drama Muzikal Dang Buncu, Pekit Sape Renggat Entarabansa enggau Pekit Kumang Gawai Renggat Kepenudi ke alai 12 iku deka bepekit ngerebut gelar kumang.

NGANGKATKA MAIN ASAL… Entara sida ti ngemai kelulu Drama Musikal Dang Bunsu enggau pemekit renggat kepenudi Ratu Cantik Festival Harvest enggau Folklore Sarawak, 2019.

Suara Sarawak