Industri filem Dayak, kurang produser

Apai Saloi The Movie filem keterubah masuk panggung wayang

INFO

Kebendar mayuh cherita lama bansa Dayak baik nya mitos tauka enda ulih digaga nyadi filem seraya ngangkatka industri filem Dayak ba menua tu

Filem siti ari media ti chukup tebilang ba selampur menua di dunya tu.

Pengawa ngaga filem keterubah iya datai ari konsep gambar ti engkebut kediri ti dipandangka jurugambar British, Eadweard Muybridge.

Ba Malaysia, industri filem kelia datai ari menua luar baka Hollywood, Hong Kong, India, Indonesia sereta ke bukai.

PERANSANG RENTAP… Bruce begulai enggau Producer ti mega nyadi pelakun filem Peransang Rentap, Lina Johor.

Nitihka pansik, dalam taun 1970-an, kurang lebih 2,000 buah filem diimport ngagai menua tu.

Taja pia, ni naka penyauh filem tu ba menua Sarawak? Bisi tauka enda nembiak diatu nemu bagi entara filem Iban keterubah ti masuk panggung wayang?

Enti ba menua luar, tentu kitai ngelala pelakun standard Hollywood baka Chris Brown, Scarlett Johansson, tauka Johnny Depp.

Ba Malaysia, mayuh pelakun tebilang ti enda tinggal ngangkatka nama menua tu ngagai renggat entarabansa.

Taja pia, bisi tauka enda bansa Dayak ti nyadi pelakun lalu filem bansa Dayak dipandangka ba panggung wayang?

BELAKUN MAYUH WATAK… Bruce ti megai watak Tuai Rumah Panggit begulai enggau siku pelakun Peransang Rentap.

Bruce Walker Breday, 44 taun berengkah enggau bidang seni melakun kenyau taun 1994.

“Keterubah iya aku masuk ba bidang tu, aku semina nyadi pelakun tambah sereta nadai dialog.

“Dua taun udah nya, aku ngaul diri dalam iklan, telefilem enggau drama,” ku iya.

Nusi peneleba dalam bidang belakun, Bruce madah semua telefilem enggau drama endur iya berengkah ngaul diri ba bidang tu iya nya telefilem tauka drama Melayu.

Lebuh dirandau pemberita, iya madah filem Iban keterubah diangkat ba menua Sarawak iya nya Saloi The Movie.

“Filem tu dipandangka ba panggung wayang ba taun 2009.

Poster Saloi the Movie

“Tu mih filem Iban keterubah ti dipandangka ba panggung wayang,” ku iya.

Berindik ari filem nya, mensia mayuh berengkah ngelala Bruce ti udah lama ngaul diri ba industri filem.

“Nya mih keterubah iya orang ngelala aku, ukai ngena nama Bruce, tang ngena nama Apai Saloi,” ku iya.

Pemujur ba filem Saloi The Movie nya, Bruce nerima mayuh pinta belakun baik nya filem tauka drama.

Entara iya drama Iban Taiko enggau filem Peransang Rentap.

Ku Bruce, iya bulih peransang nyadi pelakun ari pelakun lagenda tebilang, niang Tan Sri P.Ramlee.

“Niang Tan Sri P.Ramlee mayuh meri peransang aku nyadi pelakun.

“P.Ramlee siku pelakun ti mayuh pengelandik, kelebih agi iya ulih mayuh watak ari nyadi orang ti serius ngagai orang ti mayuh jenaka,” ku iya madah enggau gaga.

Nangkan nya, Bruce ngelalau barang sapa ti deka nyadi pelakun anang kelalu ngiga nama (populariti).

“Aku nemu mayuh macham chara muntang enti deka nyadi pelakun ti tebilang enggau jampat.

“Tang, ba aku, enda ngawa lubah, asal mayuh pekara ulih dipelajarka aku berengkah ari shooting nyentukka belakun,” ku iya.

Ku Bruce, orang ti deka nyadi pelakun patut nemu ngemaruhka diri laban ari chara nya mih sida ulih meretika watak ke diberi ngagai sida.

Ngelansa pejalai industri filem Dayak ba Sarawak, iya madahka agi jauh pejalai industri filem Dayak ba menua tu.

“Kebuah pia laban nadai mayuh producer ti mansut sereta ngangkatka cherita bansa Dayak ngagai tikas ke tinggi.

“Pia mega, kitai (Dayak) bedau bisi orang kitai empu ti teleba dalam pekara teknikal sereta pelakun,” ku iya.

Bruce mega nambah, taja kitai udah bisi tiga tauka empat filem Dayak, tang kitai mayuh ngena krew ari Semenanjung Malaysia mantu ngangkatka filem nya.

“Kelimpah ari nya, bansa kitai empu kurang nyukung industri filem bansa kitai.

“Nibuh jauh nyema, enti filem tu dipandangka panggung, kurang orang meda lalu enti meli DVD lagi enggai enda ngiga ke chelak tiru,” ku iya madah nyemetak.

Nya alai ku Bruce, ngarapka pengawa ba industri filem tu ulih muka runding sereta pengerindu bansa Dayak ngagai cherita tauka filem Dayak.

Kebendar mayuh cherita lama bansa Dayak baik nya mitos tauka enda ulih digaga nyadi filem seraya ngangkatka industri filem Dayak ba menua tu.

Kompeni pemansut chukup mayuh, tang semua meri fokus ngagai dunya pemerindang lagu aja, ukai ba filem, ku iya madah.

Filem Saloi The Movie filem keterubah Iban dipansutka ba taun 2009 digaga berindik ari ensera nembiak kelia iya nya Apai Saloi.

Apai Saloi endang ditemu enggau pendiau ti chukup bendul, ngelusu sereta ngembuan runding ti pandak.

Nitihka cherita, lain penerang dipadah ngagai iya, lain cherita nya ditusi iya ngagai orang bukai.

Taja pia, Apai Saloi jadi enggau siku indu ti chukup pintar sereta bajik dalam genturung pendiau sida lalu seduai bisi siku anak iya nya Saloi.

Pengudah Saloi tekait ati ngagai anak tauke alai iya gawa, mayuh pekara ti nyadi ngagai iya sereta sida sebilik.

Filem Saloi the Movie ti dipansutka kompeni Allen Tinggie Sdn Bhd lalu idea sereta skrip digaga Monita Jeff tu mayuh mai ajar sereta jenaka ngagai bansa Dayak.

Suara Sarawak