Inisiatif ‘Kita Jaga Kita’ patut dititih – Ali

SARATOK: Inisiatif dipejalai perintah nengeri nengah Opis Pemadah lebuh nyaga pengelikun mensia mayuh ari dirampit Covid-19 patut dipuji.

Sapit Menteri Pengeluar Kuasa enggau Pengeraja Asal, Ali Biju madah, program Sepenemu@Komuniti enggau Kimpin Ngemeran Daya Idup Baru Ngerintas Rantai Covid-19 nyadi pelasar pemadu manah mai peranak menua pesisir meretika penusah ke nuntung menua diatu.

Ku iya, inisiatif baka tu endang patut disukung ngambika menua ulih pulai likun baka selama lalu kitai ulih ngereja pengawa enggau nadai penangi agi.

“Ulah ti sengaja ngelanggar Atur Pengawa Standard (SOP) udah ditetapka perintah ukai semina ngeruga pengelikun orang ke enggau sebilik, kaban belayan tang mega orang ke semak pendiau.

“Enti nitih, kitai patut bisi ati sinu enggau kasih kediri empu enggau orang bukai lalu meretika pemesai empas jaku ‘Kita Jaga Kita’ tu,” ku iya.

ALI BIJU

Ali mansutka jaku nya lebuh dipebasa bejadika program nya ti diatur Opis Pemadah Pelilih Saratok di Rumah Mang Inggol, Sungai Wong, Brayang, ditu pagi kemari.

Iya madah, inisiatif ‘Kita Jaga Kita’ nunjukka penyiru enggau semengat rayat Malaysia ari renggat baruh ngelaban Covid-19 ari majak ngerekai enggau nabanka mayuh agi nyawa.

“Besai pengandal aku deka meda sitak Saratok mengkang dalam status gadung enggau semampai peranak ditu ngasika SOP.

“Bejimat, kitai bela bejaga lalu naka ulih nyeliahka kluster baru ti tau ngasuh kes positif Covid-19 nambah ba menua tu.

“Nya kebuah aku minta sereta ngelalau semua kitai anang ilap laban igi penyakit tu agi ngerekai, apin pukas,” ku iya.

Berebak enggau nya, 600 iti jaku penerang disadung ngagai sida ke bisi datai ngulu program diatur sehari nyentuk nya.

Ali mega bisi nyuaka 18 Kit Nagang Covid-19 ngagai bala tuai rumah enggau ketuai raban bansa ngarika nembiak redak dipegai sida.

Sama datai Ketuai Penulung Direktor Pekara Servis Komunikasyen enggau Pemansang Mensia Mayuh, Opis Pemadah Nengeri Sarawak, Ajes Tuah, Pemesai Opis Pengerai Pelilih Saratok, Dr. Syafiq Ameerul Ibtisyam Zulkiflee, Inspektor Pekara Pengelantang Mensia Mayuh (PDRM) Pelilih Saratok, Inspektor Mohamad Musa Ali enggau Pemesai Pemadah Pelilih Saratok, Florence Sebastian Unting.

Suara Sarawak