SIMANGGANG: Sapit Menteri Pemansang Bakat, Datuk Francis Harden Hollis muji pengawa nyendia kaunter Mobile Service 2U ti meri peluang ngagai rayat menua pesisir ngulihka servis bantu ti diguna.
Ku Adun Simanggang nya, genap aktiviti ti diatur ukai semina meseti ulih ngerapit kaul entara tuai enggau komuniti tang mega meri peluang ngagai sida bulih bantu perintah.
Ku iya, inisiatif Raban Indu Parti Sa’ati Rayat Sarawak (SUPP) Pampang Lingga enggau Gerempung Indu Komiti Pemansang enggau Pengelikun Genturung Pendiau (JKKK) Rumah Ipan patut dichunto.
“Aku chukup gagit taja SUPP Pampang Lingga baru aja ditumbuh tang mujur matak kaban parti lalu tu nyata dipeda pengudah nerima 54 pom nyadi kaban baru.
“Ba parti, kitai diperansang ngatur aktiviti ti ulih ngerapitka kaul enggau pangan diri.
“Lebih ari nya, ulih nyendiaka peluang ngagai komuniti ngasaika servis bantu ti diguna semak enggau rumah sida baka nengah pengawa nyendiaka kaunter Mobile Service 2U,” terang iya.
Harden mansutka jaku nya ba Pengerami Ngintu Hari Indu diatur Raban Indu SUPP Pampang Lingga enggau kerejasama Gerempung Indu Rumah Ipan di Pruan B.
Ba pengawa nya, iya ke mega Penyanding Penemu SUPP Pampang Lingga mega udah ngemendarka agih belanja Projek Mit Pemansang Menua Pesisir (MRP) 2023 penyampau RM3,000 ngagai JKKK Rumah Ipan.
Seraya RM2,000 diagih ngagai Gerempung Indu lalu Harden ngarap agih belanja ari perintah nya meseti dikena ngatur bemacham aktiviti ke pemaik semua.
Pengerami nya mega diatur berebak enggau Pengerami Ngintu Genap Taun Ke-15 JKKK Rumah Ipan, bejadika RC Crossing ngagai rumah kediri, nyuaka kad nyadi kaban SUPP enggau nerima pom nyadi kaban baru.
