Inisiatif MPP nagang Covid-19 patut dititih

KUCHING: Kaunsil Mengeri Padawan (MPP) regas meri penyedar ngagai bala pedaja ba sitak nya nengah Program Aram Sama Nagang Pengerekai Covid-19 enggau Ngemeran Daya Idup Baru.

Chairman MPP, Lo Khere Chiang madah, nya siti program ti udah dipejalaika sida ngambi nagang pengerekai Covid-19.

“Sarawak enggau Malaysia udah bejalaika bemacham inisiatif nagang pandemik Covid-19 tang kitai mesti seruran bejimat belama.

“Seharitu (kemari), kitai minta mensia mayuh sama nyereta MPP nagang pengerekai Covid-19.

“Kitai mesti nagang igi penyakit tu ari ngerekai laban kitai nadai kereban perubat pemadu manah ba dunya,” ku Khere Chiang nyemetak madah.

Khere Chiang mansutka jaku nya lebuh dirandau pemberita ba Program Aram Sama Nagang Pengerekai Covid-19 enggau Ngemeran Gaya Idup Baru di Makit Kota Sentosa, ditu kemari.

Terang iya, Sarawak nyengkaum menua tu ulih nagang Covid-19 enggau manah dibanding menua maju ke bukai.

“Pekara tu datai ari disiplin dikemeran komuniti kitai, penyiru sida enggau pangan diri nyengkaum penyiru ngagai anak mit, ruang bilik enggau ke bukai.

“Utai tu ulih dipeda lebuh mensia mayuh ngena sengkabung mua, suah masu jari enggau nyaga pemeresi diri,” terang iya.

Terang iya, piak MPP kemari nangkan mensia mayuh bejalaika tanggungpengawa diri nyaga pemeresi enggau enda nejuka semua pekara tu ngagai perintah, Kaunsil Kandang Menua (PBT) enggau piak bukai.

“Tanggungpengawa nya bepanggai ba semua rayat Malaysia lalu kerejasama ari semua kitai aja ulih nagang pandemik Covid-19.

“Kitai enda tau enda nitihka Atur Standard Pengawa (SOP) baka ditulis ba poster laban tu ngingatka semua kitai seruran nyaga pemeresi diri enggau pekara bukai,” tandu iya.

Ba lansa sama, iya madahka sida udah nyelak 1,000 poster pasal chara idup baru ti ditulis ba tiga jaku iya nya Jaku Melayu, English enggau China.

Sida mega besedia nyelak mayuh agi poster tu enti diguna.

“Ba Batu 7 aja, kami bisi lebuh ari 700 kedai seraya ba semua sitak Padawan, kitai ngembuan beribu kedai, pasar enggau ke bukai.

“Nya kebuah, ba program tu kami bepun ari Batu 7 laban ditu semak enggau Sepital Sentosa ti udah ngerikod kes positif Covid-19.

“Taja pia, semua pedaja ba Makit Kota Sentosa ba baruh enggau atas kedai nyengkaum pedaja sayur enggau pemakai ti udah beperesa lalu semua pemutus sida nya ditemu negatif,” ku Khere Chiang.

Ungkup rikod, Makit Kota Sentosa bisi 170 kedai enggau semua pengempu kedai nya ditemu negatif Covid-19 pengudah diperesa.

Suara Sarawak