Inisiatif PNRB Pakan/Julau bisi asil

PAKAN: Urung 10 iku nembiak peranak asal ditu udah nurun ngambi Kus Latih Pengelandik ba Palan Pematih Pengelandik Betukang (ABM) di Kuching berengkah 5 Jan tu tadi.
Protem Chairman Pemansang Nembiak Rebak Baru (PNRB) Pakan/Julau, Tedong Chakaw madah, tu nandaka program meri penerang ke baka tu semampai nerima sambut ti manah ari rebak baru lebih agi nembiak ari menua pesisir enti dipejalaika sereta diatur enggau manah.
“Puji Tuhan, ngarapka sida sebuat ulih ngena peluang ti datai sekali tu enggau manah lalu mujur nembuka pelajar sida enggau mujur.
“Berasai gaga laban bepeluang mantu raban nembiak ari menua asal diri iya nya Pakan.
“Tu sekeda ari inisiatif ke dipejalaika PNRB meransang raban nembiak ngansah pengelandik ba palan pematih kelimpah nyambung pelajar sida ba Universiti tauka Palan Pelajar Tinggi (IPT).
“Aku pechaya ke pengawa baka tu ulih meri empas ti besai dalam pengidup sida jemah,”ku iya ke mega Chairman Serakup Pekereja Minyak enggau Gis Sarawak (SOGWA).
Berebak enggau nya, Desmond Undi, 22 taun ari Rumah Undi, Sungai Gerunggang ngarapka diri ulih nembuka Kus Mobile Crane enggau mujur.
“Nadai jaku bukai semina besampi lalu ngarapka ulih mujur nembuka pelajar ditu dikena ngiga pengawa ti manah agi ari keudah.
“Meri terima kasih mega ngagai PNRB ti udah bejalaika pengawa ke chukup manah baka tu dikena mantu kami rebak baru ari menua pesisir,” ku Desmond lebuh dirandau Suara Sarawak.
Sapit Ketuai Unit Makit ABM Kuching, Aidawatie Manshor madah diri gaga amat laban program nya semampai nerima timbal manah ari mensia mayuh.
“Jemah kami (ABM) deka chakah agi bejalaika program baka tu.
“Tu bepelasar ari timbal enggau sambut ti chukup manah ari mensia mayuh lebih agi peranak menua pesisir ba program ke udah diatur ngelama tu baka program ti dipejalaika ABM begulai enggau SOGWA ba Dewan Mensia Mayuh di Pakan tengan bulan Dec tu tadi,”ku iya.
Lansa bekaul, Tedong bisi limpang ngagai penusah rabat di Sugai,Berasok enggau Rumah Umang ba Jalai Nunggang ditu kelimpah ari nyua bantu ngagai Kebing Baung ari Rumah Ganda,Manding ti bulih nyambung pelajar iya ba Advanced Technology Training Centre (ADTEC) di Bintulu.

Suara Sarawak