KUCHING: Opis Menteri Utiliti enggau Telekomunikasyen numbuhka empat raban aplikasyen WhatsApp nerima timbal manah ari semua opis menteri.

Menteri Utiliti enggau Telekomunikasyen, Datuk Julaihi Narawi madah, chara nya muntang sereta jampat agi nerima isu ti dibantai enti dibanding ngena surat.

Ku iya, empat raban aplikasyen WhatsApp nya dikena mantai isu bekaul pekara bekal ai, kuasa karan, pengawa nyadung gas enggau telekomunikasyen ba Sarawak.

“Semua ADUN, kaban parlimen enggau bala menteri ba nengeri tu dipasuk dalam raban tu.

“Aku nerima timbal manah ari sida ti madahka diri chukup gaga enggau konsep tu laban mayuh pekara ti enda ngena surat jampat agi bulih timbal ari opis menteri enggau ejensi bekaul,” ku iya.

Julaihi mansutka jaku nya rambau Pengerami Makai Lemai Meri Basa enggau Pengawa Ngintu Mantar Gawai Opis Menteri Utiliti enggau Telekomunikasyen ba Hotel Grand Margherita, ditu malam kemari.

Iya madahka diri temegah sereta beterima kasih ngagai bala pegawai bekaul ba pengawa meri timbal lengkas ngagai isu ti nyadi ninting hari taja nya ngasuh sida irau ati.

“Taja pia, anang kelalu irau laban kitai bejuraika penerang ti amat.

“Nya alai, kerejasama penuh ari semua opis menteri enggau ejensi perintah beguna ngambi asil manah ulih diambi dikena mutar isu ti nyadi,” ku iya.