KAPIT: Program Ruai- Based Learning (RBL) ti diatur sereta dipejalaika piak Sekula Primari (SK) Nanga Oyan nerima puji sereta perati ari mensia mayuh, tebal agi raban penguna ba media rama ‘Facebook’ apin lama ke udah.
Berindik ari semua sekula ditutup kenyau ari 9 November empai lama nyentuk 18 Disember ila, nembiak sekula ke diau ba menua pesisir sereta nadai sampung enggau akses internet enda ulih bejalaika pengawa sekula enggau belajar baka nembiak ke bukai.
Nya alai, piak SK Nanga Oyan chakah ngatur program Ruai Based Learning khas tu ungkup nembiak sekula sida ke diau ba rumah panjai sereta agi nadai sambung internet.
Peranak ba rumah panjai lama tauka moden, kelebih agi bansa kitai Iban endang teleba ngena sereta nemu guna ruai ba pengidup diri ninting hari. Ruai tu siti menalan ke besai sereta tebuka, ti suah dikena bala mayuh betugung ngatur sesebengkah pengawa, baum enggau ke bukai.
Nengah program RBL tu, pengawa belajar dipejalaika ba ruai ninting hari nitihka timpuh ti udah ditetapka raban sekula. Semua bengkah kereja enggau latih nembiak sekula nya disediaka raban pengajar tetiap subjek pelajar.
Tetiap pengari ba rumah panjai ti udah dichiri dipinta matau pengawa belajar ti dipejalaika ba ruai sereta nganjung semua latih nembiak ti udah disadung nya ba ‘Drop Zone’, ngambika diperesa raban pengajar ninting Hari Satu.
Kena Hari Empat (19 November), piak SK Nanga Oyan udah ngagihka latih enggau fail pengawa nembiak ngagai semua rumah panjai ti udah ditetapka. Semua pengawa nyuaka fail tu diagih nitihka zon.
Zon 1, raban sekula SK Nanga Oyan nuju ngagai ili sekula iya nya Rumah Bangkong enggau Rumah Weng, lalu Rumah Nawin ti bepalan ba seberai sekula tu.
Ungkup Zon 2, sida mudik Sungai Oyan nuju ngagai Rumah Jimmy Jarraw enggau Rumah Lumpun.
Nangkanka nya, Zon 3 mudik ke ulu nuju ngagai Rumah Dawin, Rumah Peter, Rumah Sengiang, Rumah Nisson enggau Rumah Along. Semua rumah panjai tu bepalan ba tebing Sungai Mujong, Kapit.
Berebak enggau tu, nengah program tu mega raban sekula SK Nanga Ayan ngarapka kerejasama entara sida enggau apai indai majak rat sereta ulih nyapai objektif program RBL nya.
