Injin lada deka disedia ba PPK Betong

BETONG: Mesin nginjin lada deka disedia ba Opis Peladang Sitak (PPK) Betong ungkup pemaik tauka guna orang bekebun lada ba genturung nya.

Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madahka opis menteri iya deka mekalka mesin nya.

“Betong nyadi sebuah palan pengeluar komoditi pemadu besai ba Sarawak.

“Mayuh orang bekebun agi nyaga manah kebun sida taja rega lada ba pasar diatu nurun,” ku iya.

Iya bejaku munyi nya lebuh bejadika Program Ngabas Komuniti ba Opis Betanam Betupi Nengeri di Rumah Jambai Bunsu di Kerapa Spak seharitu.

Tandu Uggah, Opis Peladang ba sitak nya deka meli lada ngena rega ti patut taja rega lada ba pasar nurun.

“Mesin nginjin lada tu deka mungkus lada ngena teknologi moden ngambika lada ulih dieksport ke Singapura enggau menua Eropah.

“Tu siti ari chara perintah nulung rakyat.

“Opis menteri aku mega mutuska deka meri subsidi baja beungkus RM2,000 ngagai tiap ruang bilik orang betanam betupi ditu taun tu,” ku iya.

Kenu ku iya, penyampau nya nyangka enda chukup tang ulih mantu sida ngurangka tating kos nyaga utai tanam sida.

Bejaku pasal komoditi getah, Uggah madah komoditi nya mega besai peluang meri penatai pemisi.

“Aku pechaya pun getah ke lama tauka enda produktif agi ulih nyadi sumber penatai pemisi ti baru.

“Pun getah ulih ditebang lalu ulih diguna nyadi produk dalam industri perengka rumah.

“Bisi serikat udah bisi ati tang aku mesti berandau enggau Kepala Menteri ngulihka pemendar iya,” ku Uggah.

Suara Sarawak