Insap segerit berega RM202, 000,  dibai chara belalai mujur dirampas

KUCHING: Sepenyampau 1044 katun insap segerit burak enggau 80 katun segerit kretek ti dibai chara belalai mujur dirampas ari sebuah kedai ba Jalai Tapang Kota Sentosa ditu.

Sapit Komander Pasukan Gerakan Am (PGA) Briged Sarawak Asisten Komisioner Hakemal Hawari madah pengawa ngerampas barang nya dipejalai Briged Sarawak enggau komiti Nagang Penyalah Makai Suap Malaysia (SPRM) Sarawak lebuh bejalaika operasyen ba kedai nya urung pukul 5.10 lemai kemari (Hari Tiga).

Ku iya operasyen nya dipejalai nitihka penerang Ops Libas ti disereta 10 pemesai enggau kaban ari Unit Nyubuk PGA Sarawak sereta empat pemesai SPRM Sarawak.

“Asil operasyen nya, sida mujur tetemuka segerit dipelaba nadai chukai iya nya 1,044 katun segerit burak berega RM187,920 enggau 80 katun segerit kretek berega RM14,080,” ba sebengkah penerang, ditu tadi.

Hakemal madahka semua segerit ti dipelaba berega RM202,000 udah dianjung ngagai Balai Polis Sentosa, Indu Opis Polis Pelilih Padawan ungkup pansik bukai.

Ku iya, kes dipansik di baruh Seksyen 135(1)(d) Akta Kastam 1967.