PUSA: Adun Beting Maro Razaili Gapor nampung pengawa meri insentif pelajar RM300 (pemeri sekali aja) ngagai semua nembiak ba sitak kunstitusyen iya ti deka nampung pelajar ngagai sebarang palan pelajar tinggi (IPT).
Ku iya, insentif nya lama udah dipejalai lalu deka terus ditampung ba maya dudi.

“Insentif tu nyadika belanja sida dikena mayar tiket bilun tauka bas, meli barang diguna enggau ke bukai.

“Bantu tu mega kelai aku deka sida ngasaika diri dikeibuh kelimpah nyadika peransang sida belajar bebendar lebuh ba IPT,” terang iya.

Ku Razaili, bala nembiak semina nyendiaka salin penerang diterima nampung pelajar ngagai IPT ngambi ulih ngambi insentif nya lalu insentif nya meri mayuh pemaik ngagai peranak ba Beting Maro dataika sehari tu.

Iya mega madahka diri udah nyendiaka belanja ngagai bala nembiak ti nyulut bulih pemutus peresa 8A ba peresa perintah.

Nambahka ku Razaili, entara insentif ti deka ditampung iya nya bantu pemati.

“Bantu enggau insentif tu sebagi ari chara kami mantu ngelempungka tating penusah rayat sereta enggau naka ulih mantu sida.

“Taja bantu tu mit, tang aku pechayaka pekara tu meri besai reti ngagai sida,” ku iya.

Iya ngarapka bala ketuai komuniti enggau ketuai raban bansa begempung enggau setai ngemansangka genturung pendiau ti bebaik enggau pangan diri.