Insentif RM500 ungkup orang gawa perintah dibayar bulan tu

KUCHING: Insentif RM500 ngagai pengereja pengawa Perintah Besai ti meri servis di Sarawak deka diberi ba bulan tu (Mei).

Kepala Menteri Datuk Patinggi Abang Johari Tun Openg madah insentif nya dibayar ba bulan tu beserimbai enggau Hari Raya enggau Hari Gawai ti nyau majak semak.

“Insentif nya deka dibayar ngagai genap pengereja pengawa bekaul bulan Mei tu,” ku iya nyaut pandak.

Abang Johari madah munyi nya lebuh dirandau pemberita pengudah bejadika pengawa nyuaka Pemeri Raya-Gawai 2020 di Wisma Bapa Malaysia ditu, tadi.

Beserimbai enggau Hari Orang Gawa Perintah 2019 ti diintu ba bulan Disember tu tadi, Abang Johari mantaika insentif nya ti deka meri penguntung ngagai 126,000 pengereja pengawa Perintah Besai ti gawa ba nengeri tu.

Sekretari Perintah Nengeri Datuk Amar Jaul Samion ba siti penerang bulan March tu tadi madahka insentif nya deka dibayar sebulan tumu ari timpuh ke udah ditetap.

Abang Johari ba jaku iya lebuh Hari Orang Gawa Perintah apin lama madahka insentif nya deka dibayar ba bulan Jun.

Suara Sarawak