Intu Gawai Dayak enggau chara likun

KUCHING: Serakup Dayak Nasional Sarawak (SDNU) nerima enggau manah pekara dibantaika Menteri Besai Tan Sri Muhyiddin Yassin bekaul enggau chara nyaga pengelikun ti patut dititih maya pengerami Hari Gawai.

Presiden SDNU Tan Sri William Mawan Ikom madahka sida chukup bebasaka gerah ke udah dibantaika nya nyengkaum pengerami Gawai Dayak ti semina ulih diintu diri sebilik tauka kaban belayan besemak aja lalu enda lebih ari 20 iku ba siti maya.

“Temuai meseti ari rumah panjai tauka genturung ke sama lalu ukai ari rumah panjai tauka menua bukai,” ku iya lebuh dirandau pemberita, kemari.

Kelimpah ari nya ku Mawan, lebuh pengerami nya diatur, pengawa nyaga pengelikun baka takah enggau pangan diri, ngena sengkabung mua, ngena hand sanitizer sereta ke bukai patut dikemerat.

“Taja pia, kitai di Sarawak deka nitihka gerah ke dipansutka Komiti Penyangga Penusah Ngenyit Nengeri Sarawak (JPBNS) bekaul enggau pekara tu.

Tan Sri William Mawan Ikom

“Aku melabaka pekara tu deka dibantaika JPBNS enda lama agi,” ku iya nambah.

Lebuh dirandau bekaul enggau pejalai entara nengeri ti agi diteritka ba menua tu, Mawan ti mega Adun Pakan madahka SDNU enda nagang pengerami Hari Gawai, tang pengerekai igi pemyakit covid-19 tu majak balat nyadi.

“Tu endang deka meri pangka ti balat ngagai mensia mayuh kelebih agi sida ke diau ba menua luar ti deka mulaika diri ke Sarawak ngintu pengerami Hari Gawai,” ku iya.

Apin lama ke udah, Mawan nyukung penemu Malaysian Medical Association (MMA) pampang Sarawak ti minta ngambika rayat Sarawak ke diau ba menua luar ngambika enda mulaika diri ke Sarawak ngintu Hari Gawai taun tu laban nya ulih mai penanggul pengerekai igi penyakit Covid-19.

“Kitai meseti kering ati lebuh napi penusah tu diatu lalu kitai meseti nyaga pengelikun diri enggau orang bukai nyengkaum enda mulaika diri ngagai menua ngintu Hari Gawai,” ku iya nandu.

Suara Sarawak