Isi berita patut bepelasarka penerang

“Bala pemberita patut nulis nitihka penerang ke amat, ukai nitihka ati diri empu laban nengah nya kitai ulih ngangkatka pemansang menua.”

KUCHING: Media arus perdana deka terus nyadi media ke dikearap sereta nyadi pilih bala pemacha.

Kepala Menteri Datuk Patinggi Abang Johari Tun Openg madahka penerang ti ditulis dalam media arus perdana baka surat kabar ngembuan penerang ti nyemetak sereta ulih dipechaya dibanding enggau media bukai.

“Nengah pemansang teknologi ti majak ngerembai diatu, media diatu betapi enggau siti penyakit enti sema pekara ke ditulis nya amat tauka enda.

“Tu mih pemar dalam media lalu berindik ari nya, nya alai kitai dekaka media ngembuan fakta lalu media arus perdana tu siti media ti ngembuan fakta, penerang enggau analisa ti ulih dikearapka kitai,” ku iya.

Abang Johari madah munyi nya lebuh ngemata pengawa nyain Sempekat Pemereti Ati (MoU) entara SV News Sdn Bhd enggau Media Prima Sdn Bhd di Dun Sarawak ditu, lemai tadi.

Nangkan nya ku iya, berindik ari pemar ti ditapi media diatu, mayuh undang-undang bekaul enggau media digaga ngambika ulih nagang penanggul nya.

“SV News berani mantaika diri begulai enggau Media Prima Sdn Bhd ti ulih mantu dalam meri penerang dikena sida ngaga analisa ari penanggul ditapi rayat baka dipeda kitai diatu,” ku iya.

Kelimpah ari nya ku iya, penerang ti bendar sereta ngembuan ‘ubat’ ti ulih munuh virus nya ulih nyadika rayat enggau menua tu mega jauh ari penanggul nerima infomasyen ti enda bendar.

“Nengah pekara nya kitai ulih ngemansangka rayat nitihka chuan dikedeka kitai.

“Nya alai kerejasama entara dua piak tu ulih ngeringka agi pekara tu,”ku Abang Johari madah.

Ku iya mega, teknologi udah ngubah landskap kitai tang rayat mengkang deka nerima berita ti amat ti ulih dikena sida mantu penusah ditapi komuniti ba menua tu.

“Klestarian maklumat pekara ti pemadu beguna lalu pia mega ba tikas profesionalisme bala pemberita mega patut bisi tikas diri empu.

“Bala pemberita patut nulis nitihka penerang ke amat, ukai nitihka ati diri empu laban nengah nya kitai ulih ngangkatka pemansang menua,” ku iya nerang silik.

Bela ngemata pengawa nyain MoU nya Menteri Perengka Pengangkut Datuk Lee Kim Shin sereta bala pengari rayat ke bukai.

Suara Sarawak