Isu ATM: Aku empu suah nanya pekara tu – Mawan

KUCHING: Perambu numbuhka servis ATM enggau bank ba Pakan ukai semina juluk Gerempung Raban Pakan (GRP) tang mega juluk Perintah Sarawak.

Kaban Kunsil Nengeri (Adun) N.47 Pakan, Tan Sri William Mawan Ikom madah, ATM enggau bank nya nitihka pemutus ari Bank Negara Malaysia.

“Sebedau tu, ex-Kaban Parlimen Julau Datuk Joseph Salang Gandum enggau aku empu lebuh nyadi Kaban Parlimen Saratok kala mantaika peminta tu ba Parlimen ngambika servis ATM enggau bank ditumbuhka ba Pakan.

“Kami mega nemu guna enggau peminta peranak sentang servis tu kelebih agi sekumbang Atur Tagang Pejalai (PKP) ngambi ngeluarka belanja ari bantu sekalika ari Perintah Besai tauka Perintah Sarawak,” ku iya madah nengah sebengkah penerang, ditu kemari.

Ku Mawan, Perintah Sarawak dekaka servis tu disedia ukai semina ba Pakan tang ba selampur Sarawak kelebih agi ba kandang menua pesisir.

Kena 16 April tu tadi, Sapit Kepala Menteri Datuk Amar Douglas Uggah Embas udah madah, bisi kerejasama entara Kaunsil Pengelikun Menua (MKN) enggau Bank Negara Malaysia ngambi ngelala ejensi bank ti chukup belanja.

Pengawa tu nentuka servis bank jam diatu lanchar magang kelebih agi ngemuntangka pengawa semua piak.

Penerang nya udah disukung Kaban Parlimen Julau Larry Sng mega muji inisiatif ti dipejalai MKN enggau Bank Negara Malaysia.

“Nyentuk diatu, aku empu suah nanya pekara tu nitihka pangku pengawa aku nyadi siku ari Adun di menua tu.

“Kami ngarapka Perintah Besai enggau Bank Negara Malaysia ulih berunding bejalaika inisiatif tu enggau naka pengelengkas,”tandu iya.

Pia mega, Mawan mega ngansak semua rayat terus meri sukung ba pengawa MKN enggau Bank Negara ngiga chara ke patut nangkup peminta rayat kelebih agi ba menua pesisir sekumbang PKP tu.