KUCHING: Isu agi tubah rumah panjai di Engkilili apin disambung bekal ai beresi deka nerima perati Opis Bekal Ai Menua Pesisir (JBALB).
Menteri Muda Utiliti enggau Telekomunikasyen Datuk Liwan Lagang madah pekara nya deka nerima perati ari opis menteri sida nengah JBALB.
“Au pekara nya udah dipadah lalu kami (opis menteri) meri terima kasih laban udah madahka pekara tu,” ku iya nimbal pemberita lebuh ditanya bekaul enggau berita ke ayan ba surat kabar sebedau tu, kemari.
Dulu ari nya, sekeda peranak rumah panjai ba Engkilili mansutka sebana madahka genturung pendiau sida agi tubah bedau disambung bekal ai beresi ngagai rumah.
Entara genturung ti bedau nerima bekal ai beresi tu iya nya Kampung Ensurai, Kampung Basi, Kampung Tekalong, Kampung Ijok nyentuk Kampung Pak di Engkilili.
Ngelansa pekara ke sama, sebedau tu ex-Menteri Utiliti Datuk Seri Dr. Stephen Rundi Utom bisi kala madahka Perintah Sarawak nagit 100 peratus bekal ai beresi deka diberi ngagai serata menua tu dalam timpuh lima taun agi.
Iya madahka, pengawa tu ulih dijapai taja pan mayuh projek nyambung ai beresi ngagai rumah tejanggal bekau pandemik Covid-19.
