KUCHING: Penyarut bekaul penuduk Dun Mambong patut diketu ketegal siti referendum udah diatur ba taun 2016 laban rayat sitak nya udah ngaga pemutus masuk Parti Pesaka Bumiputera Bersatu (PBB).
Penyandang Dun Mambong, Datuk Dr Jerip Susil madah, iya udah napi isu nya kenyau ari taun 2016.
“Ba taun 2016 lebuh aku menang nyadi chalun Barisan Nasional (BN), aku udah betemu enggau ex-Kepala Menteri, niang Pehin Sri Adenan Satem ngambi minta sanding penemu ari iya sentang nama pengawa ke patut dikereja ungkup sitak aku,” ku Jerip ba randau khas, ensanus.
Ku iya, niang Adenan udah ngasuh iya bejalaika siti referendum bekaul isu nya ngambi rayat ulih madahka parti ti dipilih ungkup Dun Mambong.
“Nya kebuah, referendum nya udah dipejalai lalu udah dilempai Temenggong Datuk Austin Dimin ngarika komuniti ngagai Adenan.
“Asil ari referendum, rayat dekaka Dun Mambong di baruh PBB,” terang iya seraya madahka iya udah nganjung peminta masuk PBB ba taun 2016 tang peminta nya dikemendar ba taun 2019.
Berebak enggau nya, iya madahka PBB udah ngaga pemutus bediri ba 47 penuduk nyengkaum Mambong lalu nyemetak madahka pemutus nya diiar nengah referendum nya.
“Nya kebuah, referendum nya mesti dibasa kelai basa ngagai Tok Nan enggau pemintar iya,” ku Jerip.
Penuduk Dun Mambong nyadi laya pengudah Jerip ningkilka diri ari Parti Sa’ati Rayat Sarawak (SUPP) lebuh iya menang nyadi chalun BN ba taun 2016.
Pengudah menang, iya masuk Parti Rakyat Bersatu (UPP) tauka dikumbai Parti Sarawak Bersatu (PSB).
Taja pia, Jerip ningkilka diri ari PSB lalu masuk PBB ba taun 2019 ngujungka penuduk Mambong ke mega penuduk asal SUPP diempu PBB.
Ngelansa pasal nyendiaka diri maya Pengawa Bepilih Nengeri (PRN) kena 18 Disember tu, iya madah udah nyikap diri ngelama tu lebuh nyuaka projek enggau pemansang, agih belanja sereta meri bantu ngagai rayat.
“Diatu, kami udah nyendiaka tim ungkup PBB lalu kami mega udah nanggam kaul enggau parti komponen bukai di baruh Gempung Parti Sarawak (GPS) baka SUPP, Parti Demokratik Progresif (PDP), enggau Parti Rakyat Sarawak (PRS)… semua udah sedia,” ku iya.
Iya nyemetak madah deka meri perati menang PRN ungkup GPS lalu ukai bepolitik entara parti kelebih agi pekara nya udah diputar ba taun 2016.
Bekaul pemutus ningkilka diri ari PSB ba taun 2019 lalu masuk PBB, Jerip madahka iya ngaga pemutus baka nya laban PSB enda bebakih enggau GPS.
“Ati aku semampai dalam perintah, aku ngepunka pejalai politik enggau perintah iya nya ba SUPP ke mega dalam perintah,” ku Jerip nerang baru.
Ku iya, UPP/PSB bebakih enggau BN enggau GPS lebuh nya lalu iya ngaga pemutus enggai masuk champur dalam pekara tu lebuh sida enggai nyadi bakih kunsi GPS.
“Laban pengujung iya nya pasal sapa ti ngarika kita. Sida begunaka bemacham pemansang, nya kebuah aku enggai melakangka mandat sida.
“Nya kebuah aku masuk PBB tang sekali agi, tu kelai nitihka referendum,” ku Jerip.
Kelimpah ari nya, iya meri terima kasih ngagai Kepala Menteri Datuk Patinggi Tan Sri Abang Johari Tun Openg laban udah ngemendarka peminta nyadi kaban PBB kena 29 Oktober 2019.
