Isu ditapi pedagang deka diputar lengkas

KUCHING: Perintah Besai patut mungkur Program Subsidi Gaji 3.0 ngagai pengaji di Sarawak taja ukai ba dalam Atur Mindah Betagang (PKP).

Menteri Pemansang Dagang enggau Gerempung Kerejasama Datuk Seri Dr Wan Junaidi Tuanku Jaafar madahka, iya udah betemu enggau pengari Gerempung Orang Dagang Sarawak dalam mantu mutarka isu tu.

“Mayuh serikat di Sarawak enda ulih minta bantu tu laban agi ba baruh Atur Mindah Betangang Belebas (PKPB).

“Sebaka enggau nengeri bukai, mayuh orang dagang Sarawak napi pemar laban barang dijual nurun sereta enda mayuh.

“Penanggul teknikal tu ulih diputarka enggau meruan laban enda engkeman enti orang dagang ba Sarawak enda nerima subsidi.

“Nyadi siku rayat Sarawak ti megai pangku pengawa Menteri ba renggat Perintah Besai endang patut endur aku mantu sida ngaga apil ngagai piak bekuasa,” ku iya.

Program Subsidi Upah keterubah ditumbuhka taun siti nyin kemari ungkup meri bantu belanja ngagai pengaji ti balat kena empas ekonomi ketegal Covid-19.

Program nya diatur ngambika orang dagang ulih neruska operasyen sereta nyeliahka orang lenyau pengawa kelimpah neruska penatai pemisi semua orang dagang di Malaysia.

Program tu sekali agi ditumbuhka Menteri Besai Tan Sri Muhyiddin Yassin taun tu pengudah PKP dipejalai ba selampur menua kelimpah Sarawak laban ditukuka ba PKPP.

Gerempung Orang Dagang Sarawak nyadi palan endur bepanggai orang dagang ti diarika 13 balai dagang lalu dipasuk urung 10,000 operasyen dagang ti direjister ba Sarawak.

Suara Sarawak