SARATOK: Isu bekaul pengawa betanam betupi ti ditapi bala pekebun mit deka diputar dikena ngemansang ekonomi rama sida.

ADUN Kalaka, Mohamad Duri madah, aum begulai enggau ejensi bekaul deka seruran diatur.

“Sehari tu (kemari), aku bisi ngatur randau enggau raban Sitak Pemansang Betanam Betupi Begulai (IADA) Kalaka Saribas Betong sereta mantaika penanggul ditapi raban pekebun.

“Kitai andal chara pemadu manah dikena mutar lengkas penanggul tu ulih diambi laban kitai pechaya pekara tu ulih mantu bala pekebun ngemansangka ekonomi rama sida,” ku iya kemari.

Iya meransang peranak genturung pendiau enggau rumah panjai ngemansangka tanah sida.

Mohamad madah, agenda Segulai Sejalai begulai enggau ejensi baka IADA endang dikemerat ba pengawa ngemansangka pengawa betanam betupi ba sitak Kalaka.

“Aku ngaku pemesai guna pemanah kaul enggau ejensi ti ngembuan penau.

“Enda ibuh bejaku senentang pekara bukai, abis nadai enti kitai ulih idup Segulai Sejalai, tu deka meri pemaik ngagai kitai ngelala penanggul ditapi ngambi diputar meruan.

“AKu beterima kasih ngagai IADA Kalaka Saribas Betong ti betuai ke Direktor IADA tu empu, Lucyana Dominic Ritay ti seruran meri kerejasama manah enggau ejensi bukai ba Bagi Menua Betong kelebih agi Pelilih Saratok.

“Pekara dikemerat kitai iya nya polisi perintah ulih datai lalu diasaika rayat,” ku iya.