KUCHING: Sekeda isu tauka penanggul ti ditapi raban bansa India di menua tu deka dibai ngagai ejensi enggau menteri bekaul, dikena ngintu pengelantang komuniti nya di Sarawak.
Sapit Menteri Pemansang Orang Dagang enggau Koperasi Senator Saraswathy Kandasami madah, bisi sekeda isu ti diasaika raban bansa tu bedau chukup nyemetak dibai ngagai Perintah Besai taja pen bansa India udah lama ngentapka diri di menua tu.
“Sida ngasai agi bedau chukup, baka belanja sekularship ti diberi ngagai orang India ba Sarawak enda datai ngagai sida enggau sekeda sida enda diberi peluang tama ba universiti.
“Kelimpah ari nya, sida mega madah udah lama meri servis ngagai menua baka nyadi soldadu enggau polis ti jadi enggau peranak menua ditu.
“Nya kebuah, sida deka minta permit tauka status peranak menua dilengkas,” ku iya.
Saraswathy bejaku munyi nya lebuh ditanya pemberita pengudah bejadika Program Koperasi Begulai Komuniti India Kuching di Balai Gerempung India Kuching (IAK), ditu tadi.
