SRI AMAN: Isu enggau penanggul ti nyadi ba Sepital Sri Aman deka diputar lengkas ngambika servis ti manah ulih diberi ngagai rayat ba kandang menua tu.
Sapit Menteri Pelajar, Inovasyen Enggau Pemansang Bakat ll ti mega ADUN Simanggang Datuk Francis Harden Hollis madah, iya enggau tuai raban bansa sereta raban pengatur Sepital Sri Aman udah ngatur randau dikena berandau sereta ngiga jalai mutarka isu ti nyadi ba sepital nya.
“Tuju randau tu diatur dikena ngelala isu ti ayan ari mensia mayuh kenyau sepital tu udah dibuka lalu ngiga jalai mutarka isu nya enggau lengkas.
“Sekeda isu ti ayan iya nya penanggul peneras ai ti lubah ngujungka bekal ai di sepital kurang kelebih agi pemeresi ba palan agu.
“Kelimpah ari nya, isu bukai ti dibantai iya nya pemanah infrastruktur ti enda meruan enggau pengurang lampu jalai di sepemanjai jalai tama ke sepital,” ku iya.
Harden bejaku munyi nya pengudah ngatur randau enggau tuai raban bansa sereta raban pengatur Sepital Sri Aman ba Bilik Aum Sepital Sri Aman II kena 10 Ogos tu kemari.
Ku iya, Sepital Sri Aman begunaka jalai alternatif dikena mutarka penanggul jalai sekut ba maya ti deka datai.
