Isu kuasa karan di Saratok deka teputar 2020 – KPLB

KUALA LUMPUR: Pemerinsa ditapi peranak menua pesisir nadai disikap ngena perengka guna pemun baka bekal kuasa karan nerima perati ari Kaban Parlimen Saratok Ali Biju.

Ngena awak mansutka jurai nyerumba Aum Parlimen benung diatur diatu, Ali mantaika sebana rayat ngagai Opis Menteri Pemansang Menua Pesisir (KPLB) pasal isu genturung pendiau enggau rumah panjai ti apin ngasaika bekal kuasa karan di Saratok.

Berindik ari agih belanja Skim Bekal Kuasa Karan Menua Pesisir di menua pesisir disedia di baruh piak KPLB, sekalika bisi chara pemadu baru sida mutarka penanggul sekeda genturung pendiau enggau rumah di sitak Parlimen Saratok ti udah lama nganti, ku tanya Ali.

Saut ari KPLB, ba pengawa nyendiaka Bekal Kuasa Karan Menua Pesisir (BELB) di Sarawak ti disediaka opis menteri nya kelimpah piak Perintah Sarawak mega bisi bejalaika projek nya.

Belalauka penerang ari Perintah Sarawak, bisi enam buah genturung pendiau aja agi di sitak Parlimen Saratok ti apin nerima bekal kuasa karan.

Ali Biju

Enam genturung pendiau tu iya nya Rumah Layang, Rumah Luang, Rumah Unding, Rumah Ong Lum Puh, Rumah Ragai enggau Rumah Lamada.

Nengah perambu ti dilangkar Perintah Sarawak ujung taun 2018, genturung pendiau dipelaba deka disambung bekal kuasa karan pengudah projek deka dipejalai Sarawak Energy Berhad (SEB) tembu kena Julai 2020.

Projek tu baru udah tembu ditinda lalu dipelaba berengkah dipejalai Julai 2019.

Ku KPLB, ari pejalai projek nya, isu bekal kuasa karan di Saratok udah teputar.

Taja pia, enti agi bisi genturung pendiau apin nerima bekal kuasa karan, pengari rayat sitak nya dipinta mantaika rintai nama genturung pendiau ngagai opis menteri nya ngambi atur dipejalai nitihka pematut.

Nya alai Ali ngansak genturung pendiau tauka rumah panjai ti apin nerima perengka guna tu patut ngelawa Palan Servis Komuniti Saratok lalu mantaika peminta sida.

Suara Sarawak