KUALA LUMPUR: Perintah endang ngemerat isu nembiak sekula tinggal ba sistem pelajar lalu deka diputar penuh nengah pemansang Sistem Nyidi Nembiak Sekula Tinggal Begulai.
Menteri Besai, Datuk Seri Anwar Ibrahim madah, sekula model khas baka Sekula Komprehensif 9 (K9) enggau Sekula Komprehensif 11 (K11) deka dikemayuh dikena meri peluang ngagai anak bumiputera, Orang Asli sereta ba sitak menua ulu enggau pulau ti jauh ngambi bisi akses pelajar.
“Inisiatif Sekolah Bimbingan Jalinan Kasih (SBJK) ungkup nembiak mit peranak menua tu ti tinggal enggau nadai dokumen pengelala diri deka dikemayuh,” ku iya.
Anwar mansutka jaku nya rambau mantaika Perambu Pansik Setengah Penggal RMK-12 ba Dewan Rayat ditu, sehari tu.
Iya madah, pelajar sebengkah penteba ti nyukung konsep ‘karamah insaniah’ ti deka dibantai nengah pelasar engkeman enggau meruan ti dikeandal ulih ngemansang nembiak nuju penau dunya ti disikap ngena penemu, basa enggau pemanah ulah.
Ku iya, perintah merambu deka ngemansang sistem pelajar dikena nempa raban bepenau ti endang udah bisi ungkup dudi hari nengah konsep ‘karamah insaniah’ ti ngemeratka sukut nempa pemanah ulah enggau pemansang nembiak dikena nempa rebak ti ulih besemekih.
Dikena nambahka kualiti pelajar menua, Anwar madah, Polisi Pelajar Digital (DPD) deka dilanchar dikena nempa nembiak ngembuan pengelandik digital ba jeman Revolusyen Industri 4.0.
“Juluk DPD iya nya nempa nembiak pintar digital ti ulih besemekih nengah pemansang penemu, pengelandik enggau kualiti.
“Sekeda inisiatif besai DPD baka bejalaika program latih nambah kompetensi digital pelajar, ngemanahka agi kurikulum program pelajar sereta numbuhka raban pelajar digital,” ku iya.
Iya madah, pemansang pelajar bepelasar mensia meruan deka disukung pengawa nempa modal mensia bepenemu sereta ngembuan pengelandik ba Sains, teknologi, Injinir enggau Matematik (STEM) lalu pelajar Pom Enam deka ditegap nengah meri nama baru nyadi Kolej Pro-Universiti.
“Perintah deka seruran negap Jaku Melayu nyadi Jaku Nasional ba sistem pelajar setipak enggau penuduk jaku nya ba Konstitusyen Perintah Besai kelimpah negap pengawa nguasa jaku bansa bukai nyadi pelasar nempa tamadun,” ku iya. – BERNAMA
