KUCHING: Sarawak Energy Berhad (SEB) deka bejalaika pansik ba taba Projek Tekat Ai (HEP) Baleh pengudah 60 iku ari pengereja kunterik ditemu nadai permit.
Menteri Utiliti, Datuk Seri Dr Stephen Rundi Utom madah, semua pengereja kunteriktor ari 970 iku pengereja ba HEP Baleh nya ditemu nadai permit lebuh beperesa chulit dipejalai ba taba nya kena 18 April tu tadi beduduk ari pengerekai igi penyakit Covid-19 ba dia.
Ku iya, semua pengereja kunteriktor nya udah diburu pegawai imigresyen kena 24 April tu tadi.
Taja pia ku Rundi, siku ari sida ditemu positif Covid-19 lalu benung diperubat.
“Sarawak Energy udah madah ngagai opis menteri sentang pansik silik deka dipejalai enggau audit deka dipejalai pengudah Atur Mindah Betagang Diterit (PKPD) diketu ba sitak nya.
“Tu entara inisiatif Sarawak Energy neritka atur ngagai pengereja ke nadai permit ba taba nya,” ku iya nerang, ditu kemari.
Nambahka nya ku Rundi, kunteriktor ti ditemu salah udah ngambi pengereja nadai permit deka diukum nitihka pematut baka ti udah dipadah ngagai kunteriktor sebedau tu.
Kena 18 April tu tadi, Rundi madahka siku peranak ba Kapit ti nurun gawa ba taba HEP Baleh udah ditemu positif Covid-19 laban nyadi kontak ngagai dua kes ari Kluster Pasai.
“Beduduk ari nya, pengawa beperesa dipejalai ba kandang menua nya enggau ngerikod mayuh kes positif ari pengereja ba taba projek nya.
“Pengawa nyidi kes agi ngerekai ba taba nya mega dipejalai enggau taba HEP Baleh diasuh bepekul tekala nya sebedau PKPD dipejalai dia,” terang Rundi.
Pia mega, iya madahka kereja ba taba projek mega diketu lalu semua pengereja sekalika dianjung ba palan kuarantin tauka dalam kem tauka kuarters sida diau seraya pengereja ti ditemu positif deka dianjung ngagai palan bukai enggau diperubat.
Ba lansa sama, Rundi madahka raban Projek HEP Baleh deka suah agi matau kem kunterikor enggau audit sereta ‘spotcheck’ pengereja enggau staf pengelikun dia seraya nganti pansik dipejalai.
Iya mega madah, pengawa nya dipejalai enggau kerejasama Sarawak Energy, Opis Imigresyen enggau polis ngambi meresa pengereja ti ditemu nadai permit kereja ba taba projek HEP Baleh.
“Nyadi serikat ti diempu perintah enggau dipatau opis menteri aku, Sarawak Energy enggai belembut ngagai pengereja ti nadai permit sekalika peranak menua tauka peranak menua luar.
“Semua kunteriktor enggau staf mesti nitihka gerah ti ditetapka undang-undang enggau atur ba Sarawak sereta ba Malaysia,” ku iya nyemetak madah.
Rundi nyemetak madah, penerang pasal Permit Kereja enggau Kuli bisi dipadah dalam dokumen kunterik entara Sarawak Energy enggau kunteriktor nyengkaum dalam kunterik enggau proses perolehan Sarawak Energy.
