Isu Petronas: Semina nganti pemutus kort

“Pekara tu meseti ditanya ngagai Komptroler laban sida bisi nyimpan penerang.”

LUNDU: Perintah Sarawak nganti pemutus kort ungkup penyampau chukai jual ke bedau dibayar piak serikat Petronas.

Kepala Menteri Datuk Patinggi Abang Johari Tun Openg rambau aum pemberita pengudah pengawa nasih tanah ungkup Jematan Batang Rambungan kemari madah, Perintah Sarawak semina nganti pemutus kort lalu nitihka atur undang-undang naka ke diatu.

Ku iya, iya enda ulih madah penyampau nyemetak chukai ke bedai dibayar Petronas laban nya bedau diputuska piak kort.

“Pekara tu meseti ditanya ngagai Komptroler laban sida bisi nyimpan penerang,” ku iya.

Iya mega madah diri enda lantang ati pasal Petronas ti enda meri sebarang timbal pasal atur undang-undang ke udah diterit ngagai sida.

Kena Hari Empat tu tadi, Perintah Sarawak udah neritka saman ngagai Petronas ba Kort Tinggi Kuching.

Pengawa nya digaga Sarawak bekau ari pengeliat serikat minyak menua ti enggai mayar chukai jual produk petroleum lima peratus.

Menteri Muda Undang-Undang, Kaul Perintah Negeri enggau Perintah Besai sereta Matau Projek, Sharifah Hasidah Sayeed Aman Ghazali madah, iya nyadi atur ungkup pengeliat piak serikat minya menua nya ti enggau mayar Chukai Jual Nengeri (SST) ngagai produk petroleum dibaruh Ordinan Chukai Jual Negeri 1998.

“Baka ke udah suah disebut ngelama tu, Petronas enda mayar SST ungkup produk petroleum ngagai nengeri.

“Perintah nadai pilih bukai kelimpah ngena atur undang-undang dikena mulaika chukai ke bedau dibayar,” ku iya nengah sebengkah penerang apin lama.