KUCHING: Sempekat Kontra RM1 bilion entara Perintah Besai enggau Perintah Sarawak dikena mutar isu sekula repuk di nengeri tu puntan nyapai sebarang pemutus jaku.

Pekara tu dibantaika Ketuai Sekretari Opis Menteri Pelajar Datuk Dr Mohd Ghazali Abas lebuh nempelah Menteri Pelajar Dr Maszlee Malik ba mua pengarang berita di Wisma Bapa Malaysia ditu, kemari.

Dulu ari nya Maszlee disempulang Ghazali bejalai nemuai meri basa ngagai Kepala Menteri Datuk Patinggi Abang Johari Tun Openg.

Ku Maszlee, batang tuju penemuai sekali tu berandau agih belanja RM1 bilion enggau chara manah ngena bantu nya.

“Kitai dekaka sempekat RM1 bilion tu nyadi nyata.

“Kitai mega deka nunda sempekat asal,” ku Maszlee sebedau Ghazali nempelah nyebut jaku pekara nya manah tang enda baka disebut.

“Kitai deka madah datai maya ke patut,” ku Ghazali.

Penerang tu disukung Maszlee seraya madah, sida deka mantaika penerang enti datai maya ke patut.

Sama datai nyempulang penemuai Menteri Pelajar, Sains enggau Pansik Teknologi, Datuk Seri Micheal Manyin sereta Direktor Opis Pelajar Malaysia Nengeri Sarawak Dr. Azhar Ahmad.

Dr Maszlee Malik