Isu Tanah NCR : Menteri anang diau diri!

KUCHING: Ulah Chairman Parti Keadilan Rakyat (PKR) Sarawak, Baru Bian ti enda bemunyi maya aum Kaunsil Pengereja Pengawa Nengeri Sarawak (MTNS) kena 28 Jun tu tadi langsung enda teputarka sebarang penanggul bekaul enggau isu hak tanah adat Bumiputera (NCR).

Ketua Nembiak Gempung Parti Sarawak (GPS), Gerald Rentap Jabu madah, entara isu ti dikerandau dalam MTNS kena 28 Jun tu tadi iya nya pasal belanja ari Perintah Besai ungkup pengawa nyukat tanah NCR.

“Iya (Baru) ke dipadu ngarika Perintah Besai lalu Sapit kepala Menteri, Datuk Amar Douglas Uggah Embas ngarika Perintah Sarawak bela nyadi chairman ba aum nya.

“Sida berandauka isu ukai semina pasal belanja tang polisi ti begunaka wang dikena bejalaika projek,”ku iya nengah sebengkah penerang kemari.

Tandu Rentap, nyema MTNS ukai forum endur berandauka pekara nya, rayat Sarawak patut nemu pasal pekara tu.

“Nya alai, ulah diau diri baka ke digaga Menteri Kereja Raya nya langsung nadai teputarka sebarang penanggul.

“Pengawa nyukat tanah NCR chukup beguna lebih ungkup bansa Dayak dikena nyaga tanah sida sekalika nya nengah Seksyen 6, Seksyen 18 tauka Sitak Asal Domain,” ku iya.

Iya ke mega Adun Layar madah, perintah GPS ngaga semua pengawa enggau naka ulih nyaga hak rayat Sarawak.

“Beduduk ari nya, arapka nuan (Baru) ngeleda enda ibuh kelalu dipeda imun tang patut ngaga Sarawak tu nyadi lebih manah,” ku iya.

Dulu ari nya, Baru madah, MTNS ukai pelasar endur berandau tauka ngadu sebarang atur ungkup Perintah besai tauka Perintah Nengeri.

Ku iya, aum nya semina betuju ngemata sereta beratika projek-projek sereta inisiatif Perintah Besai ungkup rayat Sarawak.