Isu telu manuk bisi kuman SE deka diputarka KPDNHEP

KUCHING: Isu telu manuk kena rampit kuman Salmonella Enteritidis (SE) deka diputarka enggau lengkas ngambika enda nyadi penanggul besai ngagai menua Malaysia.

Menteri Orang Dagang Dalam Menua enggau Pekara Penguna (KPDNHEP) Datuk Seri Alexander Nanta Linggi madahka pekara nya udah diatur sereta diputarka.

“Kami bisi pegawai ti deka matau proses kini tungga telu tu diimport.

“Patau meruan dipejalai lalu kitai deka ngaga sekeda atur ngambika pekara nya enda meri penanggul ngagai menua,” ku iya.

Nanta bejaku munyi nya ba aum pemberita pengudah Program Malaysia Prihatin di sebuah hotel ditu, pagi tadi.

Iya nyaut tanya pemberita bekaul enggau Ejensi Pemakai Singapura (SFA) ti ngerah sekeda pengimport narit pulai telu ari sebuah ladang di Malaysia laban ditemu bisi kuman SE.

Portal berita CNA ngeripotka, tu kali ti kedua dalam seminggu SFA narit pulai telu ari ladang di Malaysia laban ngembuan kuman SE.

Suara Sarawak