ARTIKEL

KENANG KITAI… Begambar bebala mayuh bala tuai rumah, kaunsilor, uchu ambu Isut enggau Friday.

Isut mubuk menua Kabo Ulu

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

ISUT nitih ke jerita, nyadi tuai orang ti muai unak, muai lemetak, muai batang, muai agang di sitak menua Kabo Ulu.

Iya tuai orang berimbau, mubuk menua ngelingi menua Bukit Tebujang.

Isut pindah ari menua Paku sama rebak maya raban bala Iban bukai ti datai pindah berumpangka menua sereta ngachir ngiga pendiau di menua Sarawak sebedau penatai Rajah Brooke ba jeman ke-19 menya.

Diatu bala peturun Isut udah manggai ba serak tubuh tauka rebak ti ke semilan.

Isut tu sigi turun orang berani, nya alai iya bisi tampun ti agi diintu sereta dikembuan bala uchu ambu iya nyentuk ke diatu.

Peturun Isut ti ngempung lalu nyadi tuai orang di menua Lempa, Kabo, iya nya Tuai Rumah Isa anak Kilat.

Lebuh Isut parai kelia, iya dilumbung ba tinting sungai jalai, iya nya bukit entara menua Lempa enggau Meruji, Kabo.

Nitih ke adat kitai Iban, ukai semua orang ti mati ulih sereta tau dilumbung.

Tebal agi sida ti dilumbung iya nya orang ti benama berita, berani tampak nama jelai rita lalu bisi pangkat ba bansa Iban.

Berindik ari nya, pengawa ensiang Lumbung Isut udah dikereja bala anak uchu ambu enggau kaban belayan iya dikena ngingatka Isut nyadi tuai orang ti muai unak muai lemetak muai batang muai agang di sitak menua Kabo Ulu munya.

Kena 18 Mei 2024, dia alai siti pengawa Ensiang Lumbung Isut bisi diatur di Tinting Julut Lemiding Lempa, Kabo, Saratok.

Nitih ke penerang, pengawa nya mega diatur serambau enggau Gawai Dayak 2024 ti deka datai.

Pengawa ensiang Lumbung Isut tu kemari betuai ke Tuai Rumah Isa anak Kilat ari Lempa, Kabo enggau sida serumah sereta kaban belayan peturun Isut.

Tuai Rumah Isa anak Kilat madah ke pengaga ati laban ulih ngatur pengawa ti baka nya lalu rindu meda bala peturun Isut ulih begelumu ba lumbung nya.

Iya megi meri terima kasih ngagai Kaban Kunsil Nengeri (ADUN) Krian, Friday Belik, ti udah ngelimpangka awak diri lalu sama enggau ngulu pengawa nya.

Sama bisi bejaku ba pengawa nya kemari iya nya Jonathan Ringgit anak Ramping ti nusui sejarah Isut.

Nambah ke nya, Profesor Dr Neilson Ilan Anak Mersat, Chairman Serakup Sejarah Malaysia, Pampang Sarawak ti ngenang pengawa Isut enggau raban iya ti ngulu ke orang berumpangka menua Kabo sebedau enggau sepengudah penatai Rajah Brooke.

Pengawa ensiang lumbung nya kemari endang dikereja enggau jalai adat tuai kitai Iban.

Enggau piring enggau ading enggau asi enggau tumpi. Enggau gendang enggau chanang. Pengawa begendang rayah mega dikereja.

Lemambang ti diambi enggau diasuh miau piring iya nya Lemambang Empading ari Layar.

Siku ari lemambang ti ngembuan pengelandik ti chukup dalam penagawa bebiau enggau besampi. Piring nitihka atur turun tujuh lalu tujuh iti.

Babi sekali sepa mega dibunuh lalu pala babi ditumbak tunga mata hari idup.

Kira lebih 100 iku tubuh bala peturun Isut enggau bala temuai bukai baka bala kaunsilor enggau tuai rumah sama bisi datai enggau begelumu.

Ngena peluang nya, Friday madah ke diri chukup muji pengawa ti diatur Tuai Rumaj Isa enggau sida serumah sereta bala bukai ba lumbung Isut nya.

Kebuah pia laban ku penemu iya, nya pengawa ti ngintu sereta ngetanka pesaka budaya kitai Iban kebendar.

“Lumbung tu sebengkah ari pesaka kitai Iban lalu endang patut diintu manah enggau ditan ngambi bisi dipeda rebak dudi.

“Ari nya tadi, pengawa ngintu enggau ngetanka pesaka kitai bansa baka tu endang patut disukung bala mayuh.

“Nya alai, akun deka meri tulung tauka geran ari perintah dikena ngaduka Lumbung Isut tu awak ke tegap agi,” ku iya ba mua mayuh rambau pengawa sehari nya.

MIAU PIRING… Lemambang Empading ari Layar dipaduka bebiau.
NGADING PENGAWA… Bala ti dipadu begendang rayah sebedau enggau sepengudah miring.
PENGINGAT BEREGA… Menira diberi Perintah Brooke menya meruan disimpan uchu Isut, Tuai Rumah Isa anak Kilat.
DIBASA… Friday anak Belik diberi basa ngayang babi dikena ngepunka pengawa.
LANTING BANSA… Prof Ilan nerangka ataur piring enggau sejarah Isut nyadika lanting bansa enggau menua Kabo.

BERITA LAIN

Sarawak merambu numbuh kaunsil padi berau

BINTANGOR: Sarawak merambu numbuhka kaunsil padi berau kediri nentuka pemansang komoditit nya ulih dipejalai berurun agi. Menteri Industri Pemakai, Komoditi enggau Pemansang Wilayah Sarawak, Datuk

Asil dagang nambah 23.8 peratus

BANDAR SERI BEGAWAN: Penyampau dagang entara Sarawak enggau Brunei Darussalam nambah 23.8 peratus, manggai RM3.76 bilion ba taun 2023. Sapit Premier Sarawak, Datuk Amar Awang

SDRAC enggau Yayasan Sime Darby mantu komuniti

KUCHING: Sime Darby Rent-A-Car (SDRAC) – Hertz Malaysia enggau Yayasan Sime Darby bekerejasama meri bantu ngagai komuniti di Kampung Siol Kandis di Petrajaya ba sebengkah

BERITA TERBARU