Iya endang orang bagas

BAU: “Iya ngereja pengawa tu laban deka ngiga duit, maya Atur Mindah Betagang (PKP) pedis deka ngiga pengawa,” ku sebana menyadi indu Martin Mat Tapa, 25, siku ari lelaki ke bebadi nyawa ba tragedi Gunung Tabai ti kena tinggang batu maya ngali lubang dikena ngulihka emas.

Kenu ku Freshilla Tapa, 26, menyadi iya nya endang bagas ngereja sebarang aja pengawa asal ulih dikena nulung sida sebilik.

Lebuh nyeritaka pekara nya, iya madah tudah Martin bisi nusi ngagai tunang iya sebedau nurun ngali emas ba Gunung Tabai begulai enggau dua agi bakih iya kena lemai Hari Dua.

“Iya endang orang bagas, bekenanas ngiga belanja dikena mayar bil karan enggau ai rumah.

“Iya bansa orang ke bebendar ngereja pengawa, ni utai ke dikeingin ati, iya sigi bebendar ngulih,” ku iya maya dirandau Suara Sarawak.

Tang, Freshilla nyima lebuh ninga jaku orang madah menyadi iya parai ketegal salah diri empu.

“Sida tau bejaku munyi nya tang ba aku, jaku munyi nya nadai guna. Kami lenyau siku orang ke pemadu disayau, uji kita ngasai ba endur kami, kami nadai minta pekara tu nyadi,” ku iya.

Berebak enggau nya, iya meri terima kasih ngagai mensia mayuh lebih agi raban bomba enggau sida serumah ke udah nyaup ngiga tudah Martin.

Freshilla (kanan) enggau tunang Martin bela ngelawa Gunung Tabai nganti mensia mayuh ti benung begigaka tudah madi iya ke benung digiga ba gua nya.

Suara Sarawak