Jaga anembiak ari rusak gian dadah

ENGKILILI: Bala tuai rumah bela megai tanggungpengawa beratika ulah anembiak di rumah panjai diri dikena nyeliahka penyalah bekenaka dadah.

Ketuai Ejensi Ngemunaska Dadah Menua (AADK) pelilih Sri Aman Lely Robert madah, penyalah bekenaka dadah enda ngira tikas umur tang tebal agi sida ke nembiak.

“Tuai rumah mega anang enda bepedaka ulah peranak sida di rumah panjai laban pengawa bekenaka dadah tu enda ngira sapa.

“Tang mayuh agi penyalah tu dikereja sida ke nembaik ti empai nemu reti nama penyadi enti ngena tauka makai dadah.

“Diatu mayuh macham bansa dadah alai kitai sama bejaga lebih agi beratika ulah nembiak,” pia ku iya madah maya mantaika licha bekaul enggau dadah beserimbai enggau Aum Besai enggau Kus Tanggungpengawa Ketuai Raban Bansa enggau Tuai Rumah DUN 33 Engkilili ke diatur Gerempung Ketuai Raban Bansa (PKKM) N,33 Engkilili ba sebuah hotel ditu, kemari.

KEMATA MANAH ANEMBIAK… Bala penyereta program begambar kenang begulai enggau Dr Rayong ba pengujung program nya.

Program sehari nya dipenyadi Kaban Kunsil Nengeri (Adun) Engkilili Dr Johnical Rayong Ngipa.

Nambahka jaku iya Lely madah, mayuh penyalah ke nyadi baka enchuri dikereja sida ti gian dadah.

Ku iya, gian dadah ngepunka pengawa ti enda menuku nyengkaum mai pangka ke enda manah ngagai pengidup komuniti.

“Pekara tu patut diperatika kitai laban ukai nyadi di mengeri aja tang bisi nyadi ba pengidup mensia mayuh di menua pesisir.

“Nya alai, ngarapka semua ulih bekerejasama enggau pangan diri ba tuju mutar sereta munas penyalah baka tu,” ku iya.

Kelimpah ari licha nya, bala mayuh ke bisi datai ba program bela mendingka licha bekaul enggau adat tikah.

Program sehari nya digulu 154 iku bala tuai raban bansa enggau tuai rumah Engkilili ari Batang Ai Ili, Lidong, Ulu Skrang enggau Skrang.