Jaga basa enggau pangan diri

LUBOK ANTU: Semua bansa meseti ngetanka ulah bebasa sereta rindu ke pangan diri ti nyadi pelasar pengelikun enggau penyerakup ba nengeri tu.

Kaban Parlimen Lubok Antu Jugah Mutang madah, penegut penyerakup ke diasai sehari tu nyadi tanggungpengawa ke besai dilempai ngagai genap iku rayat Malaysia ti meseti dijaga manah.

“Kitai di Sarawak idup begulai manah enggau pangan enda ngira bansa.

“Pemanah kaul tau ngeringka agi pengelikun enggau penyerakup sereta pemansang menua.

“Ba perintah, kitai naka ulih ngatur mayuh program bekaul enggau bansa dikena nyungkak pemereti ati rayat sentang idup pupu bansa.

TANKA PENYERAKUP: Jugah (empat kanan) sereta bala bukai maya ngelai pengerami nya, kilah ensana.

“Semua tu bepun ati kitai ke nyadi rayat Malaysia,” pia ku iya madah.

Iya mantaika jaku tu maya Pengerami Makai Lemai ke diatur Tokong Yi Bong Thai Ti begulai enggau Persatuan komuniti Cina Jelukong Engkilili, kilah ensana.

Jugah madah, seraya nya, pekara nya beguna bendar laban ke nyadi pemun pengelikun politik enggau pemansang menua.

“Aku mega ti nyadi Kaban Parlimen bela chakah mai ‘jaku rayat’ Lubok Antu ti randaka pemansang nunda pemansang pelilih bukai ke udah dulu di Sarawak.

“Aku naka alah mantaika pengingin ati meda Lubok Antu ukai semina mansang ba infrastruktur aja tang mega mansang ba tikas pelajar enggau tikas pengidup ba Aum Kabinet,” ku iya madah baru.

Bepun ari nya, iya ngarapka pengerami Hari Kebangsaan 2019 tu tadi ditimbal enggau pengeransing diri ngangkat bansa ti kering sereta tegap.

Ba pengerami nya, Jugah bela nyuaka geran RM30,000 ngagai gerempung China, Jelukong.

Iya ngarapka pemeri nya dikena ngaduka aktiviti komuniti China di Jelukong.

Pengerami sehari nya disempulang enggau macham program kelimpah digulu lebih 250 iku pengabang ari Jelukong, Engkilili.

Suara Sarawak