Jaga manah kubu lama di menua kitai

BETONG: Opis Menteri Dagang Temuai, Seni, Main Asal, Nembiak Enggau Lumba (MTACYS) deka nentuka semua kubu lama diangkat ngagai tikas ke tinggi.

Menteri iya, Datuk Karim Rahman Hamzah madah, pemujur projek tu ngemanahka agi kubu besejarah di Sarawak beguna amat ngambi ulih dipeda rebak dudi.

“Kubu tu ngembuan penyelai lalu patut diangkat ngagai tikas ke tinggi.

“Nya alai, inisiatif ngasuh Kubu Lily nyengkaum kubu bukai diaku ba renggat entarabansa nyadi Taba Pesaka Asal enggau Main Asal Dunya ari Serakup Pelajar, Saintifik enggau Main Asal Gerempung Bansa Sedunya (Unesco) endang pengawa ke chukup manah ngambika kitai dikelala ba serata dunya,” ku iya.

Iya bejaku baka nya lebuh ngarika Sapit Ketuai Menteri Datuk Amar Douglas Uggah Embas bejadika Pengawa Nyerahka Taba Projek Ngemanahka Kubu Lily Betong ba ditu, kemari.

ADAT… Abdul Karim Rahman Hamzah sereta temuai ke bukai meda pengawa miri beserimbai Pengawa Nyerahka Taba Projek Ngemanahka Kubu Lily ba ditu, kemari. Gambar OSMAN RAZALI

Ku iya, kerejasama semua piak beguna amat ngambi ulih megai tanggungpengawa ngemanahka taba besejarah nyengkaum kubu nyadi siti palan ti narit ati lalu dikelala ba serata dunya.

Kenu ku Karim, inisiatif ari pekara ekonomi ulih narit mayuh agi temuai kelimpah ulih mantu orang dagang nyungkak ekonomi sida.

“Kelimpah ari pekara sosial, infomasyen pasal sejarah enggau main asal peranak ba diak ulih dipadah ngagai komuniti luar nengah eksibisyen enggau mayuh bengkah aktiviti social ti bisi ba muzium,” ku iya.

Dulu suba, pengari Pemangku Direktor Opis Muzium Sarawak Dayang Morzanah Abang Hady nambah Opis Muzium Sarawak nengah kerejasama mayuh bengkah ejensi deka ngemanahka kubu ba nengeri tu ngagai renggat ke tinggi ngambika nyadi Taba Pesaka Asal enggau Main Asal Dunya.

“Ukai semina Kubu Lily tang kubu buka mega udah dirintai ngambika diaku baka Kubu Alice (Sri Aman), Kubu Emma (Kanowit), Kubu Brooke (Julau), Kubu Limbang (Limbang) enggau Kubu Hose(Marudi).

KUBU LILY

“Kitai ngarap lebuh diaku Unesco ulih ngasuh kubu tu dikelala ba serata dunya lalu mayuh agi temuai nemuai ke Sarawak kelimpah kitai mega deka bulih pemaik ari pengawa nya.

“Kelimpah kubu tu mega deka diperambu nyadi muzium lebuh projek ngemanahka kubu nya tembu baka Kubu Emma, Kubu Hose enggau Kubu Lily.

“Kubu tu deka mantaika sejarah, pesaka asal sereta main asal ti bisi ba setiap sitak,” ku iya.

Bisi mega datai iya nya Penyanding Penemu Sains Penyelidikan Nengeri Datuk Patinggi Tan Seri Alfred Jabu Numpang, Kaban Kaunsil Nengeri (ADUN) Layar Gerald Rentap Jabu, Residen Bagi Menua Betong Friday Belik sereta Pemesai Pelilih Saratok Mohd Ikhmal Abdullah.

Suara Sarawak