ARTIKEL

BERANGKA JAROP

Jaga manah ‘Kumang Menua’ kitai

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUMANG ba budaya kitai Iban chukup besai bendar reti lalu nya ngenang pemajik, pemintar, pemanah budi basa enggau status siku indu dara.

Nya alai, ukai sengapa orang ti begelar Kumang lalu udah tentu iya orang ti besai bendar reti ba pengidup siku orang tauka mensia mayuh.

Semadi ngenang pasal Kumang, penanyi sigat benama Berangka Jarop bisi ngeluarka lagu ti pejuluk Kumang Menua.

Leka lagu nya ditengkebang Anjie Koll lalu dikeluarka nengah chanel YouTube Selampai Kumang Music Studio.

Naka diatu, lagu nya mujur dipeda ba penyuah urung 520,000 kali enggau nerima lebih 3,400 kelai like ari mensia mayuh.

Ku Berangka, jalai cherita dalam lagu nya nadai besangkut paut enggau pengidup iya lalu nya semina lagu aja.

KUMANG MENUA
Terang iya, lagu nya ti bendar ngenang siku lelaki ti labuh pengerindu ngagai siku indu ti chukup bajik enda nyalah baka Kumang.

Nya meh kebuah, ku iya, lelaki nya ngumbai indu nya Kumang Menua laban semina indu nya aja bajik agi ari semua.

“Laban nyau gila bayang meda pemajik indu nya, nya alai, lelaki nya bendar amat muji pemanah raras tubuh iya kelimpah pemanah budi basa dikembuan indu nya.

“Munyi ku jaku orang kemaya hari, beauty with brain! Lelaki nya chukup gidan lalu ngarapka diri empu ulih ngempu Kumang bajik nya.

“Enti indu nya ulih diempu iya, indu nya sigi diasi enggau diandaika iya belama biar bekeradai ngiga belanja dikena nupi indu nya,” ku tusui Berangka.

Nangkan nya, iya madah, ba pengidup sida ti begelar laki, udah tentu bini meh nyadika Kumang sida tang ba pengidup anak, sigi indai iya meh nyadi Kumang ba ati bala anak.

Nya alai, ku iya ngelalau, genap iku indu ti berega ba pengidup kitai baka ini, indai, bini tauka anak indu kitai patut diibun, dijaga, diintu sereta diemparu enggau manah.

“Pemadu beguna, kitai enda tau enda ngayanka diri sayau, ibuh, bebasa, bejaku baruh, mentas enggau siru ngagai sida.

“Kebuah pia laban sida meh Kumang ba ati enggau pengidup kitai ti semampai bisi sereta nyukung kitai sekali ke nya maya tusah tauka senang.

“Nya alai, anang sesekali kitai ngayah, bejaku kasar sereta datai jari ngagai sida laban pemujur enggau penyulut ti digenggam kitai endang berekat ari sukung sida,” ku tampung iya.

BEGEMPUNG… Berangka ngelalau mensia mayuh begempung ngangkatka industri muzik Dayak ngambi terus nyapai penyulut besai.

PEJALAI MERINDANG
Ngalih ngagai pengerindu iya ba pengawa belagu, Berangka madahka iya endang ngembuan pengerindu ba pengawa nya kenyau ari agi mit.

Penanyi ti datai ari Sungai Balut, Julau nya madah, pengerindu belagu nya ninting hari majak bebungai ngerembai lalu nyadi sebagi ari pengidup iya.

Laban ti minat amat ba pengawa nya, dia iya suah masuk bemacham pekit belagu ti bisi diatur ba selampur pelilih Sarikei, Pakan enggau Julau.

Suah mega iya bulih champion ba pekit belagu ti dipasuk iya.

Kenu ku iya, alah tauka menang nya pekara lumur dua lalu nya endang adat maya bepekit tang peneleba enggau pekara baru ti diulih tauka dipelajarka kitai nya meh pemadu beguna.

Engka udah selatan iya ba pengawa merindang, ba taun 2020 iya betemu enggau pemungkal serikat Selampai Kumang Music Studio, Robert Bert enggau bini iya Stella Renang.

Berengkah ari nya meh iya tepejuh ba dunya pemerindang Dayak lalu lagu Sampi Hari Gawai enggau Kumang Menua mujur ngangkatka nama iya.

Naka diatu, Berangka mujur ngeluarka empat iti lagu lalu tiga iti ari nya ba baruh perabung Selampai Kumang Music Studio lalu siti ba baruh perabung Anjie Koll Sound Studio.

Entara lagu iya baka Nuan Nadai Ngenang Budi ditengkebang Robert Bert, Sampi Hari Gawai (Anjie Koll), Kumang Menua (Anjie Koll) enggau pemadu baru Alah Ayu (Anjie Koll).

PERANSANG ANAK
Lebuh dirandau pasal darah seni, Berangka madahka iya nadai ngembuan darah seni laban sida sebilik nadai mekuh pengawa merindang.

Taja pia, iya ngarap anak iya ulih mekuh pengawa merindang dudi hari laban minat anak iya ba pengawa nya endang diparit iya empu.

“Anak aku bekunsi minat sebaka enggau aku, iya minat amat ba pengawa belagu nyentuk suah masuk bemacham pekit belagu ungkup nembiak mit sereta suah champion.

“Nya alai, aku andal iya ulih nunda singkang aku ngaul industri muzik Dayak tu.

“Udah tentu aku deka nyukung penuh pemutus iya laban aku deka meda iya ngerembai enggau ngemansangka minat diri ba pengawa tu,” ku Berangka.

KEMERAH NGAUL PEMINAT… Berangka enda masau peluang begambar kenang enggau bala peminat iya.

PINTAR MUTAR PENANGGUL
Seraya bekenang pasal penguji ba dunya pemerindang, anak pengkuan ari lima iku diri menyadi nya madah, penguji nya tetap bisi ukai semina ba dunya pemerindang aja.

Ku iya, genap pengawa dikereja enggau dipasuk kitai endang ngembuan penguji kediri empu sereta enda ulih diseliah.

Pemadu beguna, ku iya, timbal kitai ngagai penguji nya beguna amat laban nya deka nentu sapa kitai.

Iya madahka diri chukup beterima kasih laban sekumbang mekuh dunya pemerindang iya nadai kala dituntung penguji ti berat.

JULUK BESAI
Lebuh bekunsika juluk diri jemah, Berangka ngarapka iya ulih nyadi siku artis ti dikerinduka bala peminat lagu Dayak ba selampur Sarawak.

Nambah ke nya, iya ngarap juluk iya deka numbuhka studio kediri empu dudi hari ulih dikeamat.

“Diatu aku agi ngumpul belanja enggau belajarka mayuh pekara baru dikena nyikap diri numbuhka studio nya ila.

“Aku minta bala peminat besampi ngambi juluk tu ulih dijapai dikena ngerichahka agi industri muzik Dayak,” ku iya.

Diatu industri muzik kitai, ku iya, udah jauh mansang ke mua ari sukut leka lagu, tiun, video muzik enggau ti bukai kelimpah dipasuk artis biak bepenau.

Peransang iya, aram meh kitai begempung ngangkatka industri muzik Dayak tu ngambi terus nyapai penyulut besai nunda singkang industri muzik menua luar.

NGERICHAH INDUSTRI
Iya mega bela meransang rebak biak ti bisi pengelandik belagu ngerichahka agi industri muzik Dayak.

Lalau iya ngagai raban nya, jaga manah ulah, jaku enggau pengawa dikereja sida laban mensia mayuh kelebih agi bala peminat semampai ngemata.

“Tunjuk meh ulah ti manah ngambi ulih nyadi chunto ngagai orang bukai tang mimit kita ilap, kita deka nerima empas ti besai lalu nya ulih ngerusak pengawa nyadi pemerindang.

“Pia mega, aku ngarap kita ulih ngasilka lagu ti bekualiti ari mayuh sukut ngambi semampai dikerindu mensia mayuh,” ku iya.

TERIMA KASIH
Sebedau ngujungka randau diri, Berangka beterima kasih ngagai bala peminat, sida sebilik, kaban belayan, bala bakih enggau bakih sama industri ti semampai meransang enggau nyukung pejalai iya ba dunya pemerindang tu.

“Terima kasih mayuh-mayuh laban kita udah nyukung aku ari keterubah aku nyingkangka kaki ba industri tu nyentuk diatu.

“Aku ulih beretan lama ba industri tu semua nya berekat ari sukung bala kita. Aku besampi Tuhan merekatka semua kitai.

“Dinga meh lagu pemadu baru ari aku ti pejuluk Alah Ayu ba pelasar YouTube. Lagu tu ditengkebang Anjie Koll,” ku Berangka.

Ngena peluang tu, Berangka ngarika sida sebilik meri Selamat Hari Gawai Dayak 2024 ngagai semua bansa Dayak kelebih agi bala peminat, bakih, kaban belayan enggau semua ti ngelala.

BERITA LAIN

Nempa Sarawak nyadi tibang pemakai

TUSUN KETERUBAH MINAT Reynold anak Jacktola, 29, ti rindu agi dikangau Nol ba pengawa betanam betupi nya endang dikembuan iya ari mit laban iya datai

Tebing Sungai Saratok deka diseleti meruan

SARATOK: Perintah Sarawak deka nyeleti pengkalan ba seberai Pasar Saratok enggau jematan dikena ngelayang Sungai Paon. Kaban Kunsil Nengeri (ADUN) Kalaka, Mohamad Duri madah, sepenyampau

BERITA TERBARU

Tiga lelaki tiba-tiba rebah akibat rokok tercemar

BERLIN, Jerman: Dua lelaki tiba-tiba rebah semalamselepas menghisap rokok yang mengandungi bahan tidak diketahui, lapor agensi berita Jerman (dpa). Rokok berkenaan dipercayai dibeli daripada penjual