Jaga pemeresi nyeliah koronavirus

SARATOK: Mensia mayuh bela dilalau seruran ngemeratka pemeresi diri berindik ari pengerekai penyakit koronavirus ke benung nyadi jam ke diatu.

Kaban Parlimen Saratok, Ali Biju madah, kitai anang enda ngemeratka pemeresi diri beduduk ari penyakit koronavirus mudah berampit ba palan ti kurang beresi.

“Terima kasih ngagai Opis Pemadah Malaysia Pampang Saratok laban udah nyendia lalu besadungka surat penerang pasal penyakit koronavirus tu ngagai peranak Saratok laban penyakit tu diatu benung ngeruga pengirau ati rayat ba serata dunya.

“Nitihka penerang ke ditemu aku naka tu, urung 30, 000 iku mensia udah kena rampit penyakit tu lalu urung 800 iku udah bebadi nyawa ba selampur dunya.”

Ali madah munyi nya rambau bejadika Program Lumba enggau Main ba Kampung Kupang ditu, ensana.

Berebak enggau nya, Ali ngansak kunterikta ke bekaul lengkas agi ngadu projek jalai alun Bajau-Kupang enggau Jematan Krian.

“Aku arapka projek ke udah dikemendar perintah nya ulih diadu enggau lengkas laban udah lama rayat ditu nganti buah pemansang baka jalai enggau jematan tu.”

“Enti projek nya udah tembu jemah, rayat ke diau ba Kupang enggau ke besemak tentu muntang agi bejalaika aktiviti ekonomi ke ulih mai ruang bilik sida terangkat mansang.”

Sebedau tu perintah udah ngemendarka dua iti projek nya ke beungkus RM180 juta nengah Langgur Pemansang Malaysia Lumpar Ke-11 (RMK11).

BANTU…Ali nyuaka bantu pukat ngagai orang berikan beserimbai enggau Pengerami Lumba enggau Main Kampung Kupang, ditu ensana.

Suara Sarawak