Jaku Iban enda tusah dipelajar

JAKU Iban nya jaku raban etnik pemadu besai bungkur ba Sarawak iya nya raban bansa Dayak Iban ke nguan satu pertiga ari peranak Sarawak.

Lebih ari sejuta iku ti nemu bejaku ngena jaku Iban laban nya batang jaku tauka dikumbai jaku ‘lingua franca’ ti dikena ba tiga menua baka menua Malaysia, Indonesia enggau Brunei.

Etnik Iban tu bisi 603,735 ari 2,071,506 iku ke alai 1,052,400 iku landik bejaku Iban baka 745,400 di Sarawak, Sabah, Labuan enggau Semenanjung Malaysia seraya 287,000 di Indonesia enggau 20,000 di Brunei.

Jaku Iban tu dalam kategori perugan jaku “Malayic” tauka Astronesia, tang ukai muntang ditemu sida ke bejaku Melayu Semenanjung tauka Indonesia dataika jaku tu enda ulih dikumbai gaya jaku Melayu.

Taja pia, sekeda raban penganda jaku madahka, 60 peratus jaku Iban nya balat bekabih enggau jaku Melayu kelebih agi jaku Melayu Sarawak.

Kelimpah dikena bansa Iban empu, jaku nya mega bisi dikena etnik bukai baka orang China, Melayu, Melanau, Bidayuh sereta Orang Ulu.

Tang, raban bansa ti ngena jaku Iban tu ngumbai jaku tu muntang dikena enggau disebut.

Kebendar, jaku Iban udah nyadi batang jaku ke dikena besehari-sehari mayuh bansa ba Sarawak kelebih agi peranak ba kandang menua pesisir.

Jaku nya ditulis ngena urup Roman taja mayuh inisiatif dipejalai ngambi ngangkatka urup Jaku Dunging ti apin dikenuku raban bekaul.

RANDAU EKSKLUSIF NST ENGGAU EX-PENGAJAR JANTAN UMBAT

Jantan Umbat

Serak tu, kitai deka nemu silik agi pasal Jaku Iban nengah randau Eksklusif New Sarawak Tribune enggau Pegawai Pansik ba Unit Sejarah Yayasan Tun Jugah, Jantan Umbat ke mega siku pengarang bup Jaku Malaysia enggau Iban.

Ulih nuan nerang silik pasal Jaku Iban ari sukut budaya tauka dikumbai antropologi?

Pemansang leka jaku Iban udah diangkat ba mayuh jeman baka Jeman Sarawak Dipegai Brooke (1841-1941), Jeman Kolonial (1948-1963) enggau Jeman Malaysia (1963-diatu).

Ba jeman dipegai Brooke (1841-1941), jaku Iban nyadi batang jaku dikena besehari-sehari.

Pengereja pengawa mesti nemu bejaku Iban ngambi sida ulih bejalaika pangku pengawa ba opis enggau kort.

Beduduk ari penumbuh sekula misyen baka St. Paul Banting (1853), St Francis Xavier, Kanowit (1884), St Luke, Simanggang (1893), St Augustine Betong (1920), St Margaret, Betong (1922), St Peter, Saratok (1925), St Paul Roban (1929) enggau St Christopher, Debak (1929) ngujungka jaku Iban dikena ungkup dua tuju.

Keterubah, batang jaku tu dikena nyadi jaku vernakular lebuh ngajar.

Kedua, nyadi batang jaku ngerembaika pengarap Kristian enggau nerang pasal pengarap Kristian lebuh meri latih ngagai raban Ketikis.

Lebuh nya, mayuh bup enggau diksionari Iban ditusun enggau dikeluar.

Entara bup ti udah dikeluar iya nya Diksionari Jaku Inggeris-Inggeris ditulis D.J.S Bailey & Howell (1900), Jalai Pengidup Begian I, Tangga Serga (1936) enggau Surat Bacha No 2 ditulis A.W. Stonton.

KE MALIN… Entara bup ti dikeluar Tun Jugah Foundation.

Taja pia, jaku Iban majak ngerembai ba Jeman Kolonial (1948-1963).

Pia mega, jaku Iban dikena mensia mayuh lebuh bejaku enggau pemesai kolonial enggau dikena lebuh naburka berita maya Radio Sarawak ditumbuh kena 8 June 1954.

Udah nya, jaku Iban terus dikena nyadi jaku vernakular, ukai semina ba sekula misyen tang mega dikena ba sekula ti ngatur bemacham pengerami pengudah numbuhka sekula kaunsil pelilih ba renggat baruh.

Ba renggat sekula sekondari, jaku nya dikena dalam peresa Sarawak Junior Certificate (SJC) dalam taun 1957.

Jaku Iban mega entara subjek ti diajar ba Kolej Latih Batu Lintang dalam taun 1968 nyentuk 1969.

PENGEREMBAI JAKU IBAN… Bup kudus ditulis dalam jaku Iban

Entara kebuah jaku Iban majak dikena ba jeman kolonial iya nya pengudah Biro Litaricha Borneo (BLB) ditumbuh nyadi pengeluar bup kena 15 September 1958.

BLB dibuka bepun taun 1958 ngagai 1976. Udah nya ba taun 1976 BLB ditutup ngambi meri awak ngagai Dewan Bahasa dan Pustaka Pampang Sarawak.

Beduduk ari nya, beratus iti bup Iban enggau majalah pemadu laku dikumbai Nendak dikeluar.

Pengawa nutup BLB meri empas besai dalam pemansang jaku Iban.

Ba Jeman Malaysia (1963 nyentuk diatu) nya jeman penumbuh Malaysia ke alai jaku Iban ti diajar ba sekula primari enggau sekula sekondari keterubah nitihka status quo.

SEPIL JAKU IBAN… Bup ari Opis Menteri Pelajar Malaysia (KPM) ngambi mantu pengajar lebuh ngajar jaku Iban.

Penanggul nyadi ba taun 1975 lebuh Komiti Gempung Pemesai deka numbuhka Akta Pendidikan di Sarawak, madahka jaku Iban nadai dipasuk dalam sistem pelajar ba Sarawak.

Empas iya, lebuh Kurikulum Baru Sekolah Rendah (Kurikulum Baru Sekolah Rendah atau KBSR) dipejalai ba taun 1983, jaku Iban nadai dipasuk dalam rintai subjek ti deka diajar.

Taja pia, jaku Iban napi penusah laban nadai silibus baka dipinta Palan Pemansang Kurikulum (CDC) Opis Menteri Pelajar Malaysia (KPM) enti sema jaku Iban diajar.

Nya kebuah, siti komiti kereja ditumbuhka Opis Pelajar Sarawak ngambi beratika tusun silibus subjek ti deka dipejurai enggau dikemendar CDC, Kuala Lumpur.

Opis Pelajar ba Sarawak nyiri enggau nganjung pemesai ngagai Seksyen Sekula indu opis ba Kuching.

NGANGKATKA JAKU IBAN… Entara koleksyen diksionari jaku Iban.

Batang tuju pengawa tu nentuka pengawa ngajar enggau pelajar jaku Iban dijaga.

Ba taun 1987, dua iku pemesai dianjung ngagai CDC, Kuala Lumpur ngambi ngulu kus nusun silibus ti diperambu ungkup sekula primari enggau sekondari.

Kededua perambu nya dibantai pemesai pelajar nengeri dalam taun 1988 dalam CDC enggau udah dikemendar.

Udah nya, kaban komiti kereja nembuka kereban bukai ti bekaul.

Taja nadai nerima sebarang agih belanja, kaban komiti nya mujur minta bantu belanja ari Unit Wang Opis ngambi ngulihka belanja komiti nya.

Tusun silibus Jurai Pelajar udah disempulang enggau begian malin pengajar.

Bup teks ungkup sekula primari enggau sekula sekondari ditusun lalu dikeluar pengudah dikemendar Unit Bup Teks lalu agi tubah pengawa dipejalai udah nya.

Dalam taun 1995 ba Hotel Rajah Court, aum besai penganda jaku Iban enggau pemesai kanan udah diatur ngambi nusun baru Atur Sepil Jaku Iban.

Belanja dikena baum enggau ngeluarka bup nya dipelanja Dayak Cultural Foundation (DCF).

Pemansang bukai dalam jaku Iban baka ubah peresa ba Pom Tiga.

Dalam taun 1977, keretas SJC Iban ditukar ngagai Sijil Rendah Pelajaran (LCE) lalu udah nya ditukar baru ngena Sijil Rendah Pelajaran (SRP).

Peresa SRP ditukar baru ngagai Penilaian Menengah Rendah (PMR).

Pia mega, KPM neritka Akta Pendidikan 1996 ngambi ditukar ngagai Akta Pendidikan 1961 ke netapka enda tau enda numbuhka Unit Jaku Etnik dalam Opis Menteri Pelajar.

Unit tu udah netapka Jaku Iban dipasuk entara keretas peresa dalam Sijil Pelajaran Malaysia (SPM) berengkah ari taun 2008.

Diatu, subjek Jaku Iban diajar ba sekula primari nyentuk sekondari.

Dikena nangkup peminta bala nembiak enggau pengajar nyikap diri napi peresa STPM, bup revision, Sistem Jaku Iban di Sekula udah ditusun enggau dikeluarka Opis Menteri Pelajar Malaysia pengudah Ketuai Iban nyain sempekat pemereti ati enggau Opis Menteri Pelajar.

Nambahka nya, jaku Iban mega diajar ba dua palan pematih pengajar iya nya Palan Pematih Pengajar Kampus Rejang di Bintangor enggau Palan Pematih Pengajar Kampus Sarawak di Miri.

Kededua kampus nya nyendiaka kus degree dalam jaku Iban. Pia mega, Universiti Perguruan Sultan Idris (UPSI) di Tanjung Malim nyendiaka kus degree enggau PhD dalam Jaku Iban seraya Universiti Malaysia Sarawak (Unimas) nyendiaka kus Iban renggat baruh ungkup bansa bukai.

Beduduk ari Iban tu ngembuan mayuh gaya jaku, ni Jaku Iban ke dikumbai standard?

Jaku Iban tu baka homogen dataika iya nadai gaya jaku. Mayuh orang ngumbai gaya jaku nya bebida nitihka kandang menua sereta bekaul adat enggau budaya idup.

Ke penerang semua, bida sukut etnik Iban nya dikelala ari nama sungai enggau kendang menua diuan bansa Iban.

Ambika banding, suku Balau diau ba Sungai Undop, Bagi Menua Sri Aman, suku Sebuyau suba keterubah mendam ba Sungai Sebuyau Kota Samarahan, suku Lemanak ba Sungai Lemanak, Skrang ari Sungai Skrang, suku Dau ba sepanjai Sungai Dau Bagi Menua Sri Aman, suku Saribas ari Kalaka enggau suku Saribas Bagi Menua Betong sereta suku Iban ti diau ba Batang Ai, Lubok Antu enggau sepanjai Sungai Batang Rejang di Bagi Menua Kapit, Sarikei enggau Sibu.

Semua komuniti tu bejaku Iban kelimpah Iban Remun ari Sungai Sadong Atas mega bejaku Iban taja bisi bida.

Pia mega, enti ba luar Malaysia, jaku ti dikena suku Iban ba Kalimantan Barat baka Bugau, Kantu, Memaloh enggau Mualang.

Diksionari Iban tu dikena ngambi muntang belajarka jaku Iban?

Bisi sekeda diksionari ngemuntangka pengawa belajarka jaku Iban baka Diksionari Jaku Inggeris-Inggeris ditulis DJS Bailey & W. Howell, Diksionari Jaku Inggeris-Inggeris ditulis N.C. Scott, Diksionari Jaku Inggeris-Inggeris ditulis Anthony Richards, Diksionari Jaku Inggeris-Inggeris ditulis Father Braughman, Diksionari Jaku Iban-Malaysia ditulis Hussain Jamil enggau Henry Gana, Diksionari Beguna Bahasa Iban enggau Inggeris ditulis Vinson dan Joanne Sutlive enggau Bup Sereba Reti Jaku Iban ditulis Tun Jugah Foundation sereta Diksionari Jaku Inggeris-Bahasa Inggeris Komprehensif ditulis Dayak Cultural Foudation (DCF).

Berapa pemayuh leka jaku Iban diterima Dewan Bahasa dan Pustaka nyadi sebagi ari Jaku Bahasa Malaysia?

Siti Komiti udah ditumbuh Dewan Bahasa dan Pustaka ngambi milih leka jaku ti tau dikena.

Entara leka jaku ti dikena baka merarau, randau tauka berandau, mansang, ngabang, landau enggau empungas.

Kelimpah ari diksionari, nama bup ti dikeluar enggau ditulis dalam jaku Iban

Bisi sekeda bup jaku Iban dikeluar Tun Jugah Foundation (TJF) enggau Komiti Adat Istiadat & Tradisi Sarawak (Mais).

Bup ti dikeluar TJF iya nya Leka Timang, Pantun Iban, Sabak, Sampi dan Biau, Renung Adat, Renung Semain, Pelian, Ripih Pengawa Gawai Antu, Jaku’ Dalam, Adat Gawai (Batang Rajang Ulu), Tiga Ensera: Indai Jubang, Kumang Bunsu Ikan Buing, Kumang Nyera, Entelah, Ensera Wat Bujang Sugi enggau Sugi Sakit.

Nangkan nya, bup ti dikeluar Mais iya nya Leka Sampi Enggau Biau, Ensera Tangkung Labu Aan, Adat Enselan Tikai, Tikah Mansau Iban Pelilih Menua Saratok, Ngepan Asal Iban, Timang Gawai Kelingkang Benih, Jaku Main Enggau Leka Main Gawai Antu, Jalai Belajar Macha Jaku Iban, Wa Enggau Denjang Dalam Gawai Iban, Timang Gawai Ngiga Tuchung Taun, Batan Timang Jalung, Leka Pupu Kenyalang, Senawah Di Ujung Pemetang, Timang Gawai Kelingang Nanga I-III, Gawai Burung, Bunga Serara, Timang Gawai Ngiga Tuah, Panduan Umum Pemindahan Kubur Masyarakat Iban enggau Menggong.

Nama kebuah jaku Iban nadai dikerembai baka jaku Malaysia enggau jaku Inggeris?

Pengawa ngerembaika jaku Iban tu kebendar bisi kaul enggau Akta Pendidikan 1961.

Nya kebuah, silibus suah betukar ba sekula enggau kurang belanja, Jaku Iban nadai dipasuk dalam Sistem Pelajar di Sarawak baka jaku Malaysia enggau jaku Inggeris.

Kemaya jaku Iban keterubah diajar ba sekula lalu sapa orang keterubah mantaika jaku Iban?

Jaku Iban tu keterubah dikena orang Kristian ba Banting, Lingga dalam taun 1853.

Nama empas ngagai nembiak maya belajarka jaku Iban?

Ba penemu aku, batang jaku tu meri empas enggau penemu ti bebida ari bala nembiak.

Penemu positif tauka negatif ari bala nembiak dalam pengawa ngajar enggau belajar (PdP) bepanggai ba peransang enggau kreativiti dikembuan bala pengajar.

Bala pengajar ngembuan pangku pengawa besai narit ati nembiak ngambi rindu belajarka semua subjek.

Nya alai, pengawa tu mega tau nyadi lebuh bala nembiak belajarka jaku Iban.

Ulih nuan nerang kebuah jaku Iban majak lemi dalam komuniti moden?

Mayuh kebuah jaku Iban majak labuh dalam komuniti moden tu.

Kesatu, parit negatif media rama baka leka jaku diasuh pandak lebuh ngena SMS.

Lebuh nganjung pesan pandak, pekara tu tau ngachau sepil enggau tusun jaku dikena kitai.

Pia mega, jaku Iban majak labuh laban orang Iban ti diau ba mengeri nadai nyengulai orang rumah panjai.

Kawin champur mega ngujungka jaku nya majak enda dikena laban sida udah dichampur enggau nukar kod lebuh bejaku entara jaku bukai lalu ngujungka jaku nya nadai penulin agi.

Kepenudi, parit jaku Melayu ti semak enggau jaku Iban kelebih agi lebuh ngena sebut glotis ke suah nambah urup ‘k’ ba ujung jaku.

Ambika chunto, indu nyau nyadi induk seraya bena nyau nyadi benak enggau chunto ke bukai.

Nama pemar ngajar jaku Iban?

Pemar iya, bala pengajar engka napi pemar meransang bala nembiak belajarka bansa jaku laban kitai begunaka pengelandik narit ati bala nembiak ngambi ngembuan pengangkun belajarka jaku nya.

Pia mega, ngajar subjek jaku Iban tu mar dikereja laban kitai mesti ngembuan semangat ngajar enggau belajar.

Tambah mega, jaku Iban tu mega mar dipelajar laban nitihka pemansang leka jaku kelebih agi reti iya laban jaku Iban tu majak nambah baka jaku bukai.

Penanggul tu mega nyadi lebuh kitai nyalin tauka ngena jaku pinjau dikena nambahka leksikon Iban.

Kelimpah ari nya, kitai mega napi pemar lebuh eleman asal dipegulai enggau situasyen moden kelebih agi dalam lagu lama enggau lagu baru.

Tang pemar ti dirintai nya ulih diputar laban semua nya bepanggai ngagai diri empu sekalika deka napi pemar tauka enda.

Nya alai, kitai mesti meransang diri empu ransing nambahka penemu diri ngambi napi semua pemar tu.

Ba peragam nuan, jaku Iban tu tau dikena dalam pengawa ngajar enggau belajar ba subjek bukai?

Aku enda ulih ngelansa silik pasal pekara tu laban laban semua tu bepanggai ba polisi pelajar.

Perambu tu engka dikemendar enti nyadi latih vernakular tang ukai nyadi batang jaku.

Baka ni narit ati orang bukai angkun belajarka jaku Iban?

Nyadi rayat pupu bansa, kitai rindu belajarka pekara baru.

Nya alai, kaul kitai enggau orang bukai kelebih agi lebuh bejaku deka narit ati kitai ngambi belajarka jaku nya.

Ambika banding, ba menua pesisir Sarawak, jaku Iban tu mega dikena bansa bukai sereta entelah mega dikerindu etnik bukai.

Kala nuan berundingka, orang ti enda nemu jaku Iban deka napi pemar ngena jaku nya?

Enda, laban mayuh orang ari mengeri tauka Malaysia Barat ti gawa ba endur bansa Iban jampat meretika jaku Iban.

Tebal agi, etnik bukai madahka jaku Iban tu muntang dipelajar.

Lebuh bejaku, anang nangika diri salah sebut patah jaku laban pekara nya beguna amat ngambi kitai landik bansa jaku.

Berebak enggau nya, diau mendam tauka gawa dalam komuniti Iban ulih mantu kitai jampat belajar enggau bejaku Iban.

Suara Sarawak