Jaku ‘ngelingkang’ madahka pengasa ati

PAKAN: Nadai nanggul enti sema orang dipilih enda nyadi chalun bediri minta pilih ba penuduk sitak Dun N47 Pakan maya Pengawa Bepilih Nengeri (PRN) serak tu.

Raban Nembiak Parti Demokratik Progresif (PDP) N47 Pakan madahka diri ukai deka ngelingkang tang kebendar sida semina berasai asa aja.

Pengari raban nya, Austin Lingoh madah, bisi orang saru penemu tauka salah peragam ngagai leka jaku ‘ngelingkang’ ti disebut iya sebedau tu.

“Reti jaku ‘ngelingkang’ disebut aku sehari nya dikena mandangka pengasa enti sema chalun ke beamat-amat ulih nyadi pengari rayat enda dipilih bediri ba penuduk Dun Pakan maya PRN ila.

“Taja pia, aku enda nyalahka orang bukai nyau salah peragam enggau saru penemu tauka berasai nyima lebuh macha jaku disebut aku nya.

“Ngena peluang tu, aku nusun sepuluh jari minta ampun nuju semua komponen parti Gabungan Parti Sarawak (GPS) kelebih agi PDP ketegal penyaru enggau pengilap tu,” terang iya.

Austin sebedau tu ba surat berita diripot madah, iya bisi nyebut jaku ‘ngelingkang’ enti sema penemu sida enda dikemana.

Nerang enggau silik agi ku iya, sida berasai asa enti parti perintah GPS salah milih orang bediri ba penduduk nya ila.

“Kami andal amat parti PDP-GPS nyiri orang ke chukup ngembuan pengelebih ngetanka penuduk N47 Pakan ba PRN ke sekali tu,” tandu iya.

Austin sekali agi ngarapka mensia mayuh kelebih agi pengundi ba sitak nya enda salah peragam senentang reti leka jaku ‘ngelingkang’ baka ke disebut iya sebedau tu.

Suara Sarawak