Jalai alun mesti digaga dulu

SARATOK: Pengawa ngemujurka projek pemansang infrastruktur pemun baka jalai alun dikearap ulih nyungkak ekonomi rama peranak ditu.

Sapit Menteri Pengeluar Kuasa enggau Pengeraja Asal, Datuk Ali Biju madah, enti bisi jalai alun dia pengawa betanam betupi muntang agi dikereja.

Ku iya, jalai alun mega deka meri pengelantang ngagai rayat mindah enggau ngereja pengawa kelimpah ulih marit projek pemansang bukai datai kia.

“Kitai udah meda, enti menua nya udah datai jalai ke alai pengawa dikemeran rayat dia baka bumai betaun, bekebun enggau betupika jelu berasai lempung dikemansang.

“Ambika chunto, sayur enggau buah ari kebun sereta jelu tupi baka jani, serati enggau manuk ulih dijual sekalika nengah orang tengah tauka kita empu ulih nyual kediri.

“Pengawa tu tadi deka mansutka asil ngagai bilik penaik kita empu lalu ulih nyungkak ekonomi enggau ngangkatka agi tikas pengidup kita kelebih agi ke diau ba menua pesisir,” ku iya.

Jaku Ali ti mega Kaban Parlimen Saratok nya disebut pengari iya, Walter Changgai rambau pejalai ngabas enggau matau gaya pejalai Projek Nyeleti Jalai Kebun Nanga Luau, ensanus.

Walter disempulang Kumpang Brandah enggau Pegawai Teknikal Opis Pemansang Nengeri Sarawak Bagi Menua Betong, Djzulkhaira Abang Ullie.

Sehari nya mega sida Walter sebuat udah limpang ngabas pejalai Projek Nyeleti Jalai Kebun Sabun ba Jalai Simpang Empat Sessang.

Berita penuh ba Ruai 5 pagila

Suara Sarawak