Jalai Bajau Kupang deka ditar

SARATOK: Projek Nyeruri Jalai Bajau Kupang beungkus RM90 juta deka berengkah ditinda ba suku keempat taun 2021 tu.

Sapit Menteri Pengeluar Kuasa enggau Pengeraja Asal, Datuk Ali Biju madahka projek nya deka ditinda pengudah langkar projek tembu digaga.

Ku iya, Jurutera Perunding mega udah dichiri lalu tinda projek nyeruri jalai 16.9 kilometer (km) pemanjai deka dikeluar enda lama agi.

“Nitihka randau aku begulai enggau Sapit Direktor (Infrastruktur) Opis Kereja Raya (JKR) Sarawak, Chiew Chee Yau sereta bala bukai, tinda projek ulih dikeluar abis laun suku keempat taun tu.

“Projek tu sebagi ari projek dipejalaika Opis Menteri Pemansang Menua Pesisir (KPLB) ke alai JKR Sarawak dipadu nyadi ejensi bejalaika projek,” ku iya.

Ali mansutka jaku nya ba sebengkah penerang berita pengudah ngulu randau khas diatur ba Indu Opis JKR Sarawak, pagi kemari.

Iya madah, projek nya ila ngaul pengawa nyeruri jalai batu ke diatu ngagai jalai betar ti deka meri pemaik ngagai peranak ke diau ngelingi menua nya kelebih agi bala pekebun mit ke bisi dia.

“Kitai deka nyeruri jalai tama ngagai genturung pendiau enggau sebuah sekula primari ke bisi 3.6 km pemanjai sereta nganti tiga buah jematan mit.

“Projek tu mungkur Rumah Ganing, Rumah Rengan, Rumah Lakon, Rumah Anau enggau Sekula Primari (SK) Sungai Entebu.

“Aku ngarapka projek tu ulih dipejalai enggau naka pengelengkas ngambi peranak dia lantang mindah enggau bejalaika pengawa sida enti jalai nyau udah manah.

“Lebuh jalai nya tembu, takah pejalai ari Kupang ke Saratok mega deka pandak agi,” ku Ali ke mega Kaban Parlimen Saratok.

Kelimpah ari nya, bemacham agenda pemansang bukai mega bisi dibai dalam randau kelebih agi ngaul infrastruktur jalai alun di Saratok.

“Aku deka seruran matau enggau nanyaka pejalai projek ngagai raban JKR Sarawak nentuka projek tu dipejalai enggau lanchar sereta ulih tembu nitihka timpuh diperambu.

“Aku andal amat projek tu ulih digaga nitihka standard enggau spefikasyen udah ditetapka kitai ngambi struktur jalai teguh enggau lubah rusak,” ku iya madah nyemetak.

Sama datai ngulu randau khas nya Sapit Direktor (Unit Pemansang Menua Pesisir) Suriati Yaakop enggau Injinir Bintang Senari PLT, Ir. Chong Wee Lin.

Suara Sarawak