KUCHING: Pengawa nutup sementara siti arung Jalai Besai Kuching-Samarahan deka dilanjar ngagai 23 September dikena meri awak ngagai pengawa nyeleti jalai nya.
Jalai besai ti berengkah ditutup kena 11 Julai nya deka diterus berengkah ari Hari Satu nyentuk Hari Minggu lalu dibagi ngagai dua renggat.
Renggat keterubah dipejalai muak ke malam berengkah ari pukul 9 malam nyentuk 4 pagi lalu renggat kedua dipejalai muak ke siang berengkah ari pukul 9 pagi nyentuk 4 pagi kena Hari Enam enggau Hari Minggu.
Opis Kereja Raya (JKR) ba sebengkah penerang madah, palan bejalaika pengawa nya mungkur Jalai Keliling Intan iya nya ari Kuching nuju Samarahan, Jalai Samarahan nuju Batu 15, Jalai Batu 15 nuju Jalai Datuk Mohd Musa sereta Jalai Datuk Mohd Musa muju Kuching.
“Penguna jalai alun dilalau bejimat lebuh betengah ke jalai nya sepanjai timpuh nyeleti jalai nya sereta ngasika semua atur trafik dikena nyaga pengelikun diri enggau orang bukai.
“Raban JKR Bagi Menua Samarahan deka meri gerah sebarang maya enti bisi sebarang ubah ba haribulan, jam tauka palan bekaul pengawa nyeleti jalai nya.
“Penguna jalai alun dilalau merambu pejalai sida ba sitak bekaul nya lalu kami minta ampun ketegal penanggul ti nyadi berebak ari pekara nya,” ku penerang nya kemari.
Mensia mayuh ti deka ngaga sebarang ripot tauka deka nemu silik bekaul pejalai trafik ba palan nya diperansang betelefon terus ngagai Opis JKR Bagi Menua Samarahan ba lumur 082-671076 ungkup jam gawa aja.
