Jalai Iban napi ubah pengidup

SRI AMAN: Leka jaku bejalai mai reti besai amat ba daya idup enggau pengidup bansa Iban kelebih agi sida ke lelaki dulu menya.

Ku Insol Harry, bejalai tu tau mega dikumbai kitai adat ti semampai dikemeran sereta ditampung ari sida ke tuai sekalika ngiga kereja tauka pengidup baru ba menua bukai.

Pengawa tu suah agi ngaul sida ke baru ngangkatka diri bujang angkat ngejangka rumah panjai diri laban deka ngasaika dunya luar, abis nadai sekali dalam pengidup sida.

Kebuah pia ku iya, sida ke tuai madahka kitai bansa neladan pengidup bujang berani Keling Gerasi Nading ti suah ngejangka menua Panggau di langit laban deka napatka menua di baruh dunya tu, ngereja pengawa bukai.

“Bejalai nya ukai pengawa genjau-genjau nadai tuju tang sida ke deka mindah tau begelumu minta sukung ari pangan diri.

NYIDI PESAKA TUAI… Entara tajau lama bisi ba tanah pendam di Bukit Lingga, enda jauh ari pendam Linggir Mali Lebu.

“Bisi sekeda ngiga kenyap dulu, tau mega mandangka piring muakka lemai sebedau nindukka diri lalu bisi kedua bejalai belalauka bunyi burung ti didinga.

“Sida ngembuan tempat deka ditapat lalu bisi juluk tauka niat dalam ati kelimpah nemu pengelama bejalai sebedau mulaika diri ke menua,” ku Insol lebuh dirandau Suara Sarawak.

Pengelama bejalai nya abis nadai enam bulan tauka setaun lalu bejalai tu bebida ari pengawa belelang.

Reti belelang iya nya ninggalka rumah nya lalu enda pulai agi ke menua sereta mutuska kaul enggau kaban belayan ba rumah panjai.

“Ba sekeda pengawa orang ke belelang nya lalu bebini ba menua bukai lalu sekeda nya lalu enda agi ngaku diri Iban.

ADAT LAMA… Entara rengka piring dibantai lebuh miringka kenyap sebedau nurun bejalai.

“Bejalai mega bebida ari pindah laban reti jaku tu nerangka semua sida ba rumah panjai nya pindah ke menua baru.

“Enti kelia pindah tu kadang-kadang ketegal deka bekuli tauka bekereja makai gaji ba endur bukai.

“Sida ke bekereja makai gaji tu engka gawa sebelah opis perintah enggau peribit, bisi pangkat sereta penuduk,” ku iya nerang.

Ku iya, bejalai mega bebida enggau pengawa ngayauka pala laban kelia ngayau nya mai pala pulai tang bejalai tu mai pulai duit ringgit, pengeraja enggau reta tengkira.

Nya alai ku Insol, pengawa bejalai ukai semina dikemeranka raban bansa Iban aja tang mega dikemeranka raban bansa Dayak ke bukai di pulau Borneo.

MATAU MENUA… Insol (tujuh kiba) nguluka bala menyadi bansa Dayak ari Kalimantan Barat nemuai ngagai Batang Ai.

“Ambika chunto raban bansa Penan bejalai ari siti palan ngagai palan bukai laban betanamka mulung, kena beridup.

“Pia mega orang Kayan bejalaika pengawa dagang sida mindah kin kitu lalu iya dikumbai pesalai.

“Taja pia, orang Iban balat agi ngemeratka pengawa bejalai, nya alai leka jaku ‘Iban’ nya empu mai reti orang ke bejalai,” ku lansa peranak asal Batu Lintang, Undop.

Nitihka jerita sida ke tuai madahka bisi kebuah orang Iban tu ngemeran pengawa bejalai kelebih agi pekara ekonomi ti ngaul pengidup.

Taja pengawa bumai betaun endang pengawa asal dikemeran ba pengidup tang sida ke lelaki nadai pengawa enti sida udah tembu nebas tanah alai bumai laban udah nya sida semina nganti maya ngetau, berangkutka padi ke rumah.

PUH BEJALAI… Insol seruran bejalai matau menua seraya ngiga penemu.

“Udah Gawai mega sida bisi lepa baru ari batang pengawa bumai lalu maya tu mih peluang sida begiga sebelah kampung, ngasu beburu, begigaka daun babas enggau engkayu ti ulih dijual di pasar.

“Chara lama ngemeranka pengawa betanam pindah meri peluang ngagai sida berimbaka tanah baru alai bumai sereta begigaka endur baru alai ngetak rumah.

“Ketegal ubah pemansang dunya, bala Iban balat agi ngena awak sida gawa ba endur bukai baka nangkal getah ba kebun getah di menua ili sereta pengawa bukai baka betukang ngaga rumah enggau gawa ba kompeni minyak,” ku iya nampung kenang diri.

Nampung pelajar ba palan pelajar tinggi kemaya hari tu mega dikumbai sebengkah ari pengawa bejalai.

Enti kelia orang pulai mai pala tang diatu bala ke nembiak pulai mai diploma, degree lalu peninggi pelajar diambi nya bepanggai ba pengepuh enggau pengeliat ati Iban nya bejalai.

NAMPUK PENEMU… Insol (kiba) disempulang bala bukai bisi bejalai ngabas pendam bujang berani Linggir Mali Lebu di Bukit Lingga.

“Ba pejalai baka tu tadi tau dikumbai ngambi pala diri empu kelebih agi baka sida ke ngambi degree ba tikas doctorate tauka PhD.

“Taja pia, kekadang tusah ga ngumbai bala Iban bejalai ketegal pekara ekonomi aja laban bisi nya enti diperatika ari sukut daya idup raban bansa Iban tu endang bansa ke enda tan diau rungguk-rungguk nadai pengawa di rumah.

“Pengawa bejalai ukai semina ketegal deka ngulihka duit aja tang mega bisi pengangkun, pengerindu sereta pemerindang laban bisi peluang meda menua bukai.

“Bala Iban gagit bejalai laban sida nemu bisi maya deka pulai ke menua diri empu lalu sida ke bejalai tu endang enda pungkang ngirum duit ke rumah ke belanja sida sebilik,” ku Insol nerang.

Nya alai ku iya, kitai suah meda sida ke pulai bejalai tu mai pulai mayuh duit sereta reta tengkira bukai kelimpah ari mai cherita ngerinduka ati bala bukai ke ninga.

Kemaya ari tu ketegal ubah singkang pemansang dunya jampat berubah, pengawa bejalai bisi bida ke alai bala pengaji kurang ngaji pengereja ti kereja sekejap aja.

Nya ngasuh bala Iban nyau lama agi ninggalka menua sida lalu pengawa bejalai tu nyau udah nyadi chara idup ketegal pekara ekonomi.

“Sida deka dilatih, diberi kereja sereta gawa jauh ari menua ke alai sekeda nya nyau mupuk diau di mengeri lalu chara bejalai enda jauh bida ari pemindah orang menua pesisir ngagai mengeri besai.

“Bejalai kemaya hari tu mega mai peneleba ba pengidup kitai siku-siku, ngulihka pengidup menyana agi sereta pansut ari penyeranta.

“Taja ubah pemansang nyegang baka ai pasang, orang Iban ke bejalai gawa ke mengeri tetap mulaika diri ke menua pengudah pichin ari gawa jemah.

“Tu mih ke nyadi gaya pengidup nipakka ubah pemansang dunya sereta meruan bebasaka daya idup, penatai diri enggau taka pengidup mensia.

“Nya mih kebuah bala Iban kemaya hari tu mujur bendar napi ubah nyadi ngelingi rampa pengidup diri empu ke alai bejalai nya udah nyadi pelasar idup dikena Iban napi peneras ubah peman

Suara Sarawak