Jalai kebun digaga ari Kpg Annah Abang ke Kpg Jaber

PADAWAN: Jalai Kebun deka digaga ari Kampung Annah Abang ke Kampung Jaber ditu, deka mutarka penanggul jalai alun ke ditapi mensia mayuh ba genturung pendiau nya.

Menteri Muda Perengka Pengangkut Datuk Dr. Jerip Susil madahka, jalai alun nya digaga ba baruh Projek Transformasyen Menua Pesisir (RTP) lalu nelan belanja RM500,000.

“Jalai tu ngaul genturung SK Pengkalan Ampat nyentukka Kampung Jaber laban Kampung Jaber bedau bisi ngembuan jalai alun.

“Peranak kampung udah setuju meri pemendar ngagai kami ngaga jalai alun tu mansa tanah sida nengah surat pemendar mansa sereta enda ibuh dibayar pampas,” ku iya.

Iya bejaku munyi nya ngagai pemberita pengudah bejadika Program Nasih Tanah Projek RTP Ngaga Jalai Kebun ari Kampung Annah Abang ke Kampung Biya Jaber ba SK Pengkalan Ampat ditu, kemari.

Tandu iya, jalai tu digaga urung 3.2 kilometer pemanjai deka digaga ngena jalai tanah dulu ba renggat keterubah.

“Ba renggat kedua kereja ngetar jalai deka digaga lalu dipelaba tembu bulan September tu ila.

“Aku ngarapka renggat kedua projek tu tembu enggau lengkas iya nya dalam timpuh lapan bulan” ku iya.

Jerip mega meri terima kasih ngagai Opis Kereja Raya (JKR) Bagi Menua Kuching, kontriktor, orang ti ngempu tanah enggau orang bukai ti bekaul.

Jerip (mua) maya Program Nasih Tanah Projek RTP Ngaga Jalai Betanam Betupi ari Kampung Annah Abang ke Kampung Biya Jaber ba SK Pengkalan Ampat ditu, kemari. -Gambar Ramidi Subari

Suara Sarawak