DIKENA perintah ngerapitka kaul entara mengeri enggau menua pesisir Kepala Menteri Datuk Patinggi Tan Sri Abang Johari Tun Openg madahka jalai raya nyadi infrastruktur pemadu beguna dikena besambungka selampur menua lebih agi ngagai menua pesisir di selampur Sarawak.
Kaul jalai alun meri empas ti tinggi kelebih agi lebuh deka ngerembaika dagang sereta muka tanah baru ungkup pekara bukai baka sektor betanam betupi enggau dagang temuai.
Nya alai, dalam nyapai pekara tu Perintah Sarawak chakah bejalaika sekeda infrastruktur pemansang mungkur ngelengkas ke pengawa ngaga jalai alun di serata menua.
Kelimpah ari nya, pengawa tu mega meri empas ti tinggi endur ngelimat jam pejalai ari menua pesisir ngagai mengeri kelebih agi lebuh deka beguai baka nuju sepital, berubat enggau ke bukai.
Udah nya, mayuh jalai alun dikemanah dalam mantu rayat bulih perengkaguna pemun ngatur pengawa baka bumai, bekebun enggau ke bukai.
Sekeda jalai alun dirumban ngambika ulih meri pangka ekonomi ngagai peranak menua endur bedagangka semua utai tanam sida baka nanas, pisang, jagung, buah enggau ke bukai.
Kelimpah ari nya, jalai alun mega deka meri peluang ngagai sektor dagang temuai, kelebih agi menua Sarawak chukup tebilang enggau pemanah rampa menua baka gua, palan ai wong, utai tumbuh, jelu babas enggau ke bukai.
Projek jalai alun mega nyaup rayat di menua pesisir muka tanah baru endur bejalaika mayuh pengawa ti ulih nambahka penatai pemisi baka betanam betupi, muka kilang, ngaga produk hiliran enggau ke bukai.
Pengawa tu deka meri peluang pengawa puang ngagai peranak besemak seraya ngurangka pemindah rayat ari menua pesisir ngagai mengeri ti sekut.
Nya alai, mayuh projek ngaga jalai raya diatur perintah lebuh deka ngemansangka menua nyerumba projek pemansang bukai baka bekal kuasa karan, bekal ai beresi, internet enggau ke bukai.
