Jalai peranak Skirau Ai beridup

KAMPUNG tu mih sebagi ari daya pengidup rumah panjai kelimpah ngundan macham bansa bulu babas ke tau diambika lauk, utai tumbuh tau ke ubat, bansa kayu manah ke ramu rumah enggau ke bukai.

Sekali tu, kitai deka bekenangka sekeda daya idup dikemeran peranak ke diau ba menua pesisir kelebih agi ba kandang ngelingi menua Skirau Ai, Sri Aman.

Baka menua bukai dikelingi macham bansa bulu babas, peranak rumah panjai endang nadai pungkang lauk laban muntang aja begiga ba sebelah babas tauka kebun.

Tambah mega, bansa lauk diulih dalam babas baka kemiding, terung Iban, paku, tubu, ensabi umai enggau lauk bukai endang nyamai amat lalu nadai beleman dibela.

Enti pulai ke menua, sigi dulu matah bulu babas ti kena pansa lebuh ba rantau jalai laban di mengeri semua nya ulih meli kelimpah rega tu mar lalu sekeda udah layu.

NADAI BELAMPUNG TULANG… Peranak Skirau Ai diketuai Tuai Rumah Inchang semampai bekerejasama enggau sampal sekayu rumah ngereja pengawa baka ngaga rumah gerempung.

DAGANG BA TAMU

Endang nadai kala lebu enti tulang regas nurun begigaka lauk sebelah babas. Ambika chunto nurun bebala mayuh lebuh ngiga kemiding.

Pengawa baka tu ukai semina ngerinduka ati tang mega ngasuh kitai rindang bebakih begulai enggau diri serumah, nadai ngira biak tauka tuai.

Bisi sekeda nurun begiga ambika bisi ke lauk diri empu, bisi mega deka dijual sebelah tamu dikena nambahka belanja diri sebilik. Semua pengawa tu meri penguntung ngagai sida.

Ku Tuai Rumah Inchang, peranak Skirau Ai endang ngemeranka pengawa begigaka rambai enggau kantuk kemiding laban deka dijual ngagai Tamu Simanggang.

“Kami serumah ditu ngiga kemiding ke lauk enggau bisi mega dijual laban mayuh madang kemiding sepanjai jalai ari Skirau Ai ngagai Pasar Simanggang.

“Rambai enggau kantuk kemiding ti dijual deka diagih lalu ditungkus manah ngena daun buan. Rega mega ulih ditangkup sida ke meli ngujungka kemiding dijual sida jampat laku,” ku iya.

Nambahka nya, kemiding tu nyamai amat enti diguring champur belachan enggau chabi mimit lalu entara pemakai ke suah diudar lebuh makai ba hotel tauka restoran.

Enti bisi temuai tauka gempuru gerija, sigi bansa lauk babas tu digiga bala temuai kelimpah nyingkau lauk dagin enggau ikan.

PEMANSUT EKONOMI… Siku peranak Skirau Ai benung kiruh matahka rambai enggau kantuk kemiding ke lauk sida sebilik.

BAGAS NGIGA BELANJA

Kelimpah nyual kemiding ku Tuai Rumah Inchang, sida semenua mega bisi nyual pemakai asal ke jarang ditemu ba menua bukai baka lelitak.

Lelitak tu sebansa utai idup ba tanah kelebih agi ba tegalan umai lalu asai iya nyau deka asai lintan manuk. Bisi sekeda orang rindu makai lelitak ti direbus pia aja gulai serai tauka rebus enggau daun changkuk manis.

Menua Skirau Ai endang tebilang enggau asil padi paya enggau padi bukit ke alai berau mirah entara utai dijual suah ditapatka mensia mayuh.

Pia mega asil berikan ti nyadi sebagi ari pemansut ekonomi peranak ditu, ku Tuai Rumah Inchang nampung.

“Enti musin ikan enggau undang nyaru, chukup mayuh orang nurun begiga sebelah ai. Entara ikan suah diulih sida baka ikan penat, ikan buntal, undang galah, ketam enggau bemacham bansa ikan bukai.

“Rindu meda bala sida ke nembiak bebakih enggau sida ke tuai nurun nyagam sebelah sungai. Tu mih pengawa ti mai kaul kami serumah balat rat,” ku iya.

Tuai Rumah Inchang madah, bumai nyadi batang pengawa sida serumah lalu semua rurun pengawa suah dikereja chara beduruk tauka ngaji pangan diri.

“Enti tembu ngetau, kami serumah sigi bejual bemacham bansa lauk, ikan dikena nambahka penatai pemisi diri.

“Asil ari bejual ba tamu ulih ke belanja meli utai diguna bukai nyengkaum barang dapur. Reti iya, nadai awak tebasau ngapa laban diisi enggau pengawa ke mansutka asil,” ku iya temegah.

Ku iya, enda ibuh sebut enti musin buah datai, sigi dedat tamu endur bala bejualka asil kebun buah diri empu.

Entara buah bemusin suah ditapat ba tamu Simanggang iya nya buah dabai, kemayau, kemantik, rian, langsat, rambai, isu, ma, temedak enggau bemacham buah kampung bukai baka buah kubal, puak, buah ridan sereta lumuk.

NGASUH LELENGAU… Lebuh pulai ke menua, sigi bisi aja orang berikan mai asil ikan ke agi idup laban baru diulih.

NGENA PENGAYA KAMPUNG

Bungkang entara utai tumbuh suah dikena ngulai pemakai elalu kayu bungkang mayuh tumbuh dalam kampung ba menua kitai ditu.

Bansa kayu tu tumbuh suah ditemu ba bukit, emperan enggau sebelah tebing sungai lalu buah iya mesai leka lingkau ti bechura mansau chechinang.

Siku peranak Skirau Ai benama Ara madah, daun bungkang tu suah dikena ngulai lauk baka ikan, dagin jani, manuk tauka jelu kampung.

“Daun bungkang nya sigi suah dikena kami ngulai lauk kelebih agi lebuh nyumai kasam jani, ikan enggau lauk bukai.

“Bau renggut daun tu mega ulih muai bau sinang dagin tauka bau lang ikan ke dipanduk kitai.

PEMAKAI NYELAI… Lelitak chukup nyamai sereta isi iya manis taja direbus pia aja.

Ku Ara, daun tu ulih dijembi dataika rangkai ngambika tan disimpan lalu kitai enda ibuh nurun ke tanah ngambi daun idup lebuh begunaka iya.

“Ba rumah panjai, bisi aja lauk kitai enti sema bagas nurun ke tanah kelimpah endur kami betanam enggau bukit nya semak aja ari rumah.

“Kampung tu sigi besai reti ba pengidup rumah panjai endur kami begigaka daun babas, buah enggau ngiga jelu kampung baka jani,” terang Ara.

Ara madah, lebuh bejual ba tamu Simanggang, sigi begaut orang meli sayur babas baka kemiding, paku tubu, macham bansa upa baka upa maram, upa lalih enggau ke bukai sereta daun sabung.

“Lebuh kami serumah bebai ngiga lauk ngagai bukit tauka madang kemiding, sigi mayuh utai dibai pulai.

“Bisi mega ngiga kemiding laban deka dijual dikena nambahka belanja. Enti udah nyual berapa ikat kemiding umbas amat ke belanja kena meli barang dapur,” ku iya.

“Ukai semina nya aja, kami ba ditu mega suah berikan enggau bulih mayuh asil ikan baka ikan palau, ikan terubuk, ikan penat, ikan terusan enggau bansa ikan bukai.

Ku Ara, ikan ba rumah panjai nya endang laku amat laban agi baru kelimpah isi ikan nya manis amat. Nya alai, tu mih sebagi ari pengidup rumah panjai di Skirau Ai.

Bemacham chara enggau pengawa sida dikena ngidupka diri kelimpah ngiga belanja nyengulaka bala anak enggau diri sebilik.

Suara Sarawak