Jalai putus, siku ibu bakal tepangka ba stering kerita

BETONG: Siku indai tuai kesal ati sereta bakal ba pala enggau mulut pengudah tepangka ba stering lebuh ngenyit ngetuka kerita ketegal jalai putus.

Diana Janting agi kesal ati lebuh raban bomba ngesah iya ba jalai besai semak simpang Nanga Buai, Melanjan, Ulu Padeh ke putus, tumu pagi tadi.

Nitihka penerang, ibu Diana dalam pejalai mansang ke Pasar Betong urung pukul 6 pagi, enda memukai penusah jalai putus nyadi ba mua.

Iya ti balat kesal ati lalu ngenyit ngindik break kerita ngujungka kening enggau mulut iya telih laban tepangka ba stering.

Koperal Amirul enggau siku agi bakih iya ari unit pematau Indu Opis Polis Pelilih (IPD) Betong ngesah ngagai endur penusah nyadi pengudah seduai nerima kangau urung pukul 7.15 pagi.

Lebuh datai dia, jalai endang udah putus kurang lebih 20 meter pemanjai enggau semilan meter penalam.

“Nitihka penerang ari piak QCCE, sida nerima ripot bekaul penusah urung pukul 6.40 pagi sebedau kami kia.

“Jalai nya putus ketegal engkelebat ditabanka peneras ai Sungai Sibau ti alit laban kayu besai.

“Sungai ke alit ngasuh ai jampat niki diumba ujan bangat ngujungka kelebat rarat lalu jalai putus,” terang iya.

KESAL ATI… Diana (kiba) benung diperubat siku raban APM Betong ti bejalaika operasyen nyelamat enggau matau endur penusah nyadi tumu pagi tadi.

Suara Sarawak