Jalai Rh Takang enggau Rh Janggu ampuh 0.6 meter peninggi

BINTANGOR: Ujan bangat nadai ngetu kenyau ari dua hari ke udah ngujungka jalai ngelawa Rumah Takang enggau Rumah Janggu ditu ampuh lemai kemari.

Ketuai Balai Bomba enggau Penyah Penusah Bintangor, Nicholas Belulin madahka ai majak niki manggai 0.6 meter peninggi ba jalai nya nitihka gaya ai diperatika sida.

Naka diatu ku iya, jalai nya agi ulih ditengah entukar seraya peranak dia agi ulih bejalaika pengawa sida baka selama.

“Entur ditu endang suah ampuh kelebih agi musin pengujan enggau ai pasang raya.

“Nya alai kitai ngarapka ai deka surut lalu kitai deka seruran matau endur tu nentuka pengelikun peranak ditu,” ku iya lebuh dirandau tadi.